Vittus Qujaukitsoq Savalimmiuni

Naalakkersuisoq Vittus Qujaukitsoq Savalimmiuni Inunnik isumaginninnermut Kommuninullu tunngatillugu Ministerimik Annika Olsenimik ataatsimeeqateqarpoq.

 

Aningaasaqarnermut Nunamullu Namminermut Naalakkersuisup Vittus Qujaukitsup ippassaq savalimmiuni ministeri Annika Olsen inunnik isumaginninnermut kommuninullu tunngatillugu ministeriusoq ataatsimeeqatigaa.

Ataatsimiinnermi pingaartumik kommunini suliassaqarfiit iluiniittunut tunngatillugu Kalaallit Nunaanni Savalimmiunilu inuiaqatigiinni pissutsit unammilligassallu pillugit imminnut ilisimateqatiigiipput.

Vittus Qujaukitsup ilaatigut nassuiaatigai, Kalaallit Nunaata pisortat aaqqissuussaanerat, tassunga ilanngullugu kommunit ilusilersugaanerat nalilersorlugu ingerlakkaat, tassanilu ilaatigut nunaqarfinni minnerusuni illoqarfinnilu anginerusuni assigiimmik sullissinissap qulakkeerneqarnissaa unammilligassaasoq. Aamma utoqqaat pillugit suliassat Kalaallit Nunaata nassuiaaserlugit aallartippai. Aammattaaq Vittus Qujaukitsoq ilisimatitsivoq, Kalaallit Nunaanni pisortatigut suliassat tamarmiusut pingajorarterutaasa missaanniittunik kommunit suliaqartartut, sulissutigineqartorlu suliassat amerlanerit kommuninut isumagitinneqartarnissaat.

Ataatsimiinnermi sammineqartut ilagaat sulisinnaasorpassuit suliffeqannginnerat pillugu Kalaallit Nunaat annertuumik suliassaqartoq. Annika Olsen nassuiaavoq, Savalimmiuni tassunga assingusumik annertuumik unammilligassaqartoqanngikkaluartoq, suliffissaqartitsiniarnermik suliniuteqartoqassasoq pillugu Lagtingi ukioq kingulleq aalajangiisoq, tassani pingaarnertut siunertaalluni inuit ataavartumik suliffeqanngittannginnissaasa qulakkeerneqarnissaa.

Inuusuttut nunanut allanut nuuttarnerat pillugu Kalaallit Nunaat Savalimmiullu assigiimmik unammilligassaqarput, oqaloqatigiissutigineqarporlu nuuttarnerat qanoq unitsinneqarsinnaanersoq.

Ministerit marluullutik ataatsimeeqatigiinneq assut iluarisimaarpaat, tassa ataatsimoortumik soqutigisat pillugit suliassarpassuarnik oqaloqatigiissuteqaramik, isumaqatigiissutigaallu suleqatigiinnertik annertusarniarlugu.