Meeqqat atuarfianni suleqatigiinneq pitsaanerusoq

Atuarfik Ukaliusami (USK) Nuummiittumi ilinniartitsisut 14-it Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisumut Nick Nielsenimut ammasunik allagaqarput. Sulinerminni atugarisatik, atuartut angerlarsimaffiinik suleqateqarnerup annikippallaarnera, meeqqat sumiginnakkat immikkut iliuuseqarfigineqannginnerat, klasseni naalanngittarneq kiisalu atuartut atuarnerminni angusaluttarnerat ilinniartitsisut allakkaminni naammagittaalliuutigaat. Nick Nielsenip Nunat Avannaarliit Siunnersuisooqatigiivisa Oslomi ataatsimiinneranni peqataanini pissutigalugu taamanikkut siunnersuutigaa, ajornartorsiutit qulaani pineqartut pillugit kingusinnerusukkut ataatsimeeqatigiissinnaallutik.

USK-imi ilinniartitsisunik ataatsimeeqateqarnissaq marlunngornermi 3. december 2013-imi pisinnaalerpoq. Ataatsimiinnermissaaq peqataapput IMAK-ip siulittaasua Sivso Dorph kiisalu Kommuneqarfik Sermersuumi atuarfik pillugu ingerlatsiveqarfimmi aqutsisut.

Nick Nielsen oqarpoq: ”USK-imi ilinniartitsisut ulluinnarni sulinerminni naammattoortakkatik ammasumik unneqqarissumillu oqaluttuaraat. Ilinniartitsisut ataatsimeeqatigiinnermi ilaatigut inassutigaat, atuarfiup angerlarsimaffiullu suleqatigiinnerat annertusarniarlugu illua´tungeriit qanoq peqataanerulersinneqarsinnaanerat peqqissutsimut ilaqutariinnermullu kiisalu ilinniartitaanermut tunngasunik akisussaaffillit, Kommuneqarfik Sermersuumi aqutsisut peqatigalugit eqqartortariaqaraat. Naleqartitat maannakkornit ersarissarneqarnerunissaat pisariaqartinneqarpoq.”

Ilinniartitsisut arlaqartut oqarput, Kommuneqarfik Sermersuup atuartut holdinut agguataarneqartarnerannik atorunnaarsitsisimanera ilinniartitsisut sulinerminni atugarisaasa ajornerulersimanerannut pissutaasorigitsik. Atuartut ilikkagassatigut inissisimaffimminnut naapertuuttumik atuartinneqartarnerat holdinut agguataarisarnerup kingunerisimagaluarpaa.

Atuartut, ilinniartitsisut, aqutsisut, IMAK-ip naalakkersuinermillu suliallit suleqatigiinnerisa pitsanngorsarneqartariaqarneranik ilinniartitsisut oqarnerat Nick Nielsenip isumaqatigaa. Nickip USK-imi ilinniartitsisut neriorsorpai Asii Chemnitz Narup ataatsimeeqatiserineqassasoq. Suleqatigiinnerup pitsanngorsarneqarnissaa ataatsimiinnissami tassani eqqartorneqarsinnaavoq.