2013-imi Ujarassiorimmi ajugaasoq toqqarneqarpoq!

Ujarassiorit 2013

Upernavimmiu Niels Berthelsen unammisitsinermi Ujarassiorimmi akissarsiassaq annerpaaq eqqorpaa, akileraarutitaqanngitsunillu 55.000 kronenik akissarsitinneqarluni. Niels Berthelsen Upernavimmiit Maniitsumi arni inuuissiortoq nalliussiartorluniarlugu angalatilluni, Attup kujataani Kangermi saffiugassiamik sulfiditalimmik nassaarpoq. Ujarallu nassaani Ujarassiorimmut nassiuppaa ajugaassutigalugulu.

Ujarak misissorluarneqareermat paasineqarpoq, 0,2 %imik Koboltimik akoqartoq aamma 0,25%imik kanngussamik aqerlumillu akoqarluartoq. Ujaqqamillu misissuinerit aallaavigalugit Attumi saffiugassamik sulfiditalimmik koboltimik, aqerlumik kanngussamillu akulimmik nassaassaqarluarsinnaanissaa ilimanaateqarpoq.
Naliliisartut pingaartillugu maluginiarpaat, ujarak nassiussaq qaarsummit peerneqarsimasoq, suminngaanniillu tiguneqarsimanera erseqqissumik nalunaarsorneqarsimalluni naammattumillu angissuseqartoq.

Ukiormanna aappaattut akissarsiassaq akileraarutitaqanngitsunik 25.000 kronenik naleqartoq, Aappilattormiumit Kevin Isaksenimit eqqorneqarpoq. Taassuma ujarak aligortalik ersittumillu gultitalik (saffiugassaq tonsiuppat 382 gramimik gultitalik) aamma arsen (0,24 %) nassaarisimavaa. Ujarak Narsap avannaani Kangerluarsuup eqqaani nassaajuvoq, tamaanilu siornatigut gultimik nassaartoqarsimanngilaq.

Marluk pingajuusutut akissarsitinneqarput immikkullu akileraarutitaqanngitsunik 10.000 kronenik akissarsitinneqarlutik.
Tasiilamit Ingrid P. Angenold, Tasiilap eqqaaneersumik ujaqqamik pinngoqqaammik molybdænitaqarluartumik (tonsiuppat 335 gramimik akulimmik) nassiussivoq, nassaarfik molybdæneqarluarsinnaaneranik ilimanaateqarpoq tamaani granitteqarluarmat. Pingajuattut akissarsisup aappaa Niaqornaarsummiuuvoq, tassa Johannes Jeremiassen Nuussuup kangiatungaaneersumik ujaqqamik saffiugassamik sulfiditalimmik nassiussaqarpoq. Ujaqqap akui ukuupput 32.5% aqerloq, 0,89 % zinki aamma siilvi 238g/t.

Sisamat akileraaruserneqanngitsunik 5.000 kronenik immikkut akisssarsitinneqarput:
•Uummannamiit ujarak nassiussaq annertuumik zinkimik akulik (4,05 %) aamma flusspat. Nassaartuulluni Uummannarmiu Sara Kristiansen.
• Maniitsumiit ujarak taartoq, kanngussamik akoqarluartoq (3,02 %), aqerloq(1,53 %) aamma zinki (0,46 %). Maaniitsormiunit Bobbi Petrussenimit aamma Jakob Petrussenimit naassaarineqarluni.
• Sermiligaap eqqaani ujarak nassaaq saffiugassaavoq sulfiditalik aamma gultitaqarluartoq (4,06 g/t), kanngussaaq (0,37 %), aqerloq (0,69 %) aamma siilvi (320 g/t). Lasarus Mikaelsenimit Tasiilameersumit nassaarineqarluni.
• Ujarak saffiugassamik sulfiditaqarluartoq Karl-Peter Jakobsenimit Arsup eqqaanit nassaarineqarpoq, taannalu guldtimik annertuumik akoqarluarluni (0,35 g/t) aamma arsen (238 g/t).

Ujaqqat katillugit 858-it ukioq manna Ujarassiorimmut nassiunneqarsimapput, taakkunannga 201-it misissoqqinneqartussatut ingerlaqqipput. Ukiuni pingasuni kingullerni unammisitsinermut ujaqqat nassiunneqartartut amerliartuinnarput.

Nuna tamakkerlugu ujarassiorluni unammisitsisarneq ”Ujarassiorit” ukiut 25issaanni maanna ingerlanneqarpoq. Kikkulluunniit ujaqqamik nassaaminnik ujarassiuunut misissortikkusutaminnik allakkerivikkut akiliinatik nassiussisinnaapput. Ujarassiorluni unammisitsisarneq pillugu nittartakkami www.ujarassiorit.gl –imi paasissutissanik misissuisinnaapput.

Ujarassiorit

Assimi ujaqqanik nassaarfiit takuneqarsinnaapput.

Inuussutissarsiornermut, Aatsitassaqarnermut Suliffeqarnermullu Naalakkersuisoqarfik Ujarassiorimmik aningaasalersuisuullunilu allaffissornikkut ingerlatsisoqarfiuvoq. Akissarsiallu aningaasaateqarfinnit suliffeqarfinniillu ataani takutinneqartunit aningaasalersorneqarput.

Sponsore Ujarassiorit 2013

Nunaminerals A/S akissarsiassanut 10.000 kronenik tapiissuteqarpoq.