Aalisarsinnaanermut akuersissutinik tunniussisarneq

Sapaatip akunnerani uani Ilulissani innuttaasunik ataatsimiisitsinermi, minnerunngitsumik sinerissamut qanittumi qaleralinniarnermi, siunissami pisasseeriaasissaq pillugu Naalakkersuisut Siulittaasuat naalakkersuisut isumaliutaat pillugit oqaaseqarpoq. Naalakkersuisut Siulittaasuata oqaaserisai assigiinngitsunit qisuariarfigineqarput.

Aalisarnermut, Piniarnermut Nunalerinermullu Naalakkersuisoqarfiup tamanna aallaavigalugu makku erseqqissassavai:
Naalakkersuisut tunngaviusumik oqaatigereerpaat kissaatigalugu aalisarsinnaanermut akuersissutinik tunniussisarnermik, pisasseeriaaseq ilanngullugu, eqaannerusumik siunissami pilersitsisoqassasoq. Naalakkersuisut tunngaviusumik isumaqarput siunissami aaqqiissutissami tunngavigineqartariaqartoq aaqqissuussineq piffissami sivisunerusumi allaffissornikut aqunneqarsinnaasoq aalisartunullu ataasiakkaanut iluaqutaasoq, kiisalu allaffissornermi sipaaruteqartoqarneranik malitseqartoq. Ukiunut arlalinnut pisasseeriaaseqalersinnaanermik isuma mianersortumik suliassaavoq, aamma pisassiissutinik tunniussisarnerup aqunneqarnerata pisariillisarneqarnissaa eqqarsaatigalugu.

Aalisarnermut, Piniarnermut Nunalerinermullu Naalakkersuisoq tamatumunnga atatillugu oqarpoq, ”Naalakkersuisut tunngaviusumik isumaqarput ukiut ataasiakkaarlugit akuersissutinik tunniussisarneq qimakkiartuaarneqartariaqartoq, ajornanngippallu piffissamut siviusunerusumut atasinnaasunik akuersissuteqartarneq eqqunneqarluni. Taamaaliortoqassappalli tamanna aamma aalisakkanut ataasiakkaanut pisassiissutigineqartartunut TAC-nut ataqatigiittariaqarpoq. Ullumikkut aalisakkanut ataasiakkaanut ukiumut pisassiissutit tamarmiusut TAC aalajangersarneqartarpoq ukiumut ataatsimut inassuteqaataasartut tunngavigalugit”. Naalakkersuisunut ilaasortap nangilluni oqaatigaa, ”Taamaattumik periaatsip aqunneqarnera allanngortissagaanni piumasaqaataavoq susassaqartut peqatigiilluta aaqqiissummik tamatta inooqatigisinnaasatsinnik nassaarniarnissarput, siunissamut aaqqiissutissap piujuaannartitsinissamik periaaseqarnermik tunngaveqarnissaa ilanngullugu.”
Naalakkersuisut taamaattumik siunissamut aaqqiissutaasinnaasut oqallisigeqqinniarpaat, pissusissamisuussallunilu isummat tamakku aamma Inatsisartut 2014-imi upernaakkut ataatsimiinnerata aallartinnginnerani ingerlanneqartussatut naatsorsuutigineqartumi aalisarneq pillugu isumasioqatigiissitsinissarsuarmi ilanngullugit oqallisigineqarpata.