Suleqatigiinneq qajannaallisaanerlu

Pisortat ataatsimoorussamik ingerlatsinikkut suleqatigiinnerat qajannaallisarlugu nukittorsarlugulu

Politikkikkut Ataqatigiissaarisoqatigiit, tassaasut Naalakkersuisunut ilaasortat tamarmik aamma borgmesterit sisamaasut KANUKOKA-llu siulittaasua, decembarip ulluisa qulingiluaanni ataat­si­miinnerminni inuiaqatigiinni pisortat ataatsimoorussamik ingerlatsineranni iluarsisariallit imaan­naanngitsut eqqartorpaat.

Pisortat sullissinneranni suliassanik ingerlatsinerup naammassisaqarsinnaassutsillu tungaatigut nu­taa­­mik eqqarsaler­nissaq pisariaqartinneqarpoq. Pisortat ingerlatsineranni aningaasartuutit tatisinerat malunnaqaaq.

Taamaattumik illua’tungeriit akuersissutigisimavaat qanoq iliuusissamik pilersaarut, pisortani suli­assanik isumaginninnerup pitsanngorsaatissaannik arlalinnik aallartitsinissamik imaqartoq.

Pisortat suleqatigiinnerata ingerlaqqinnissaani taasariallit pingaarnerit oqaloqatigiissutigineqarput Namminersorlutik Oqartussat kommunillu suleqatigiinnissamik isumaqatigiissuteqaqqinnissaat pil­lugu nassuiaatip malitsigisaanik.

Aningaasaqarnermut nunamullu Namminermut Naalakkersuisoq Vittus Qujaukitsoq ima oqarpoq:

”Kommunini suleqatigisannik ullumi naapitsinera nuannareqaara. Nutaanik isumaqatigiissute­qar­nis­satsigut aningaasanut tunngassuteqartut piinnarnagit aammali pisortat ingerlatsiviisa suleqatigiin­nerat ataatsimut isiginerullugu ukkatariniarparput. Ingerlatsinerup sanaartornerullu pilersaarusior­ne­qarneranni innuttaasut ukioqatigiiaat qanoq agguataarneranni pissutsit allannguutissaat eqqumaf­fi­gisariaqarput. Suleqatigiinnissamik isumaqatigiissutissap isumaqatigiissutaasimasut pisoqqat arlallit taarsissavai, taamalu siunissami politikkikkut allaffissornikkullu Namminersorlutik Oqartussat kom­munillu suleqatigiinnissaat erseqqinnerusumik paasiuminarnerusumillu najoqqutassiuunne­qassaaq.”

KANUKOKA-p siulittaasuata Martha Abelsenip erseqqissarpaa tamatumani pingaartumik pineqar­mat innuttaasut pitsaasumik sullinneqarnissaat.

”Taamaattumik ingerlariaqqinnissami pingaartorujussuuvoq innuttaasut susassaqartutut misiginis­saat peqataatinneqarnissaallu. Aammami innuttaasut atugarissaarnissaat tamatumani pineqarpoq. Pitsanngorsaanerillu kissaatigineqartut anguneqarsinnaassappata aalajangiisuulluinnassaaq allaffis­sornermi qarasaasiaqarnikkut systemit siunissami pisortaqarfinni assigiinngitsuni ’imminnut oqa­luus­sinnaanissaat’, imaappoq suleqatigiissinnaanissaat,” Martha Abelsen oqarpoq.

KANUKOKA-p siulittaasuata naammagisimaarnerarpaattaaq nassuiaasiap taaneqartup suliarineqar­neratigut akimut ersitsumillusooq paasiuminassuseq anguniarneqarsimammat, tamannalu innuttaa­sut assigiinnerusumik atugaqalersinniaraanni pisariaqarmat.

Pisortat suliassaqarfiisa aaqqissuussaanerannik iluarsaaqqinnerup nalilersorneqarnissaanut tunnga­vissamut missiliuusiaq aammattaaq oqaluuserineqarpoq, isumaqatigiissutigineqarporlu tunngavis­saq taanna sap. ak. 6-ini tusarniutigineqassasoq, taavalu Politikkikkut Ataqatigiissaarisoqatigiit ja­nu­­aarip 22-ani ataatsimeeqqinnissaanni inaarutaasumik akuersissutigineqarumaartoq. Tunngavissaq Naalakkersuisut tusarniaanernut nittartagaannut ilineqarumaarpoq uunga: http://naalakkersuisut.gl/kl-GL/Tusarniaanerit

Aammattaaq Politikkikkut Ataqatigiissaarisoqatigiit aalajangerput suliassaqarfinnik nussuiniarnerit Inatsisartunut aammalu kommunalbestyrelsinut qinersinerit kingornatigut uninngasimasut aallarteq­qin­ne­qarlutillu sukkatsisarneqassasut.

Illuatungeriit isumaqatigiipput Naalakkersuisut kommunillu akornanni ajunngitsumik attaveqaqati­giinnerit attatiinnarniarneqassasut nukittorsarneqassasullu. Tullianik ataatsimiinnissaq 2014-imi sap. ak. 4-mi pissasoq siunniunneqarpoq.