Naalakkersuinikkut ataatsimeersuarneq Moskva, Rusland

Nannut pillugit Naalakkersuinikkut ataatsimeersuarneq Moskva, Rusland

Nannut illersorneqarnissaannut aqunneqarnissaannullu isumaqatigiissut Oslo Konvention atsiorneraniit ukiut 40-nngortorsiornermut atatillugu ministerit oqartussaasut ataatsimeersuarput Moskvami 4. december 2013. Naalakkersuisunut ilaasortaq Karl Ly-berth ataatsimeersuarnermi peqataavoq.
Ataatsimiinnermi suleqatigiinnikkut nannut piujuartinnissaannik suliniuteqarnissamut oqaaseqaat Naalakkersuisunit akisussaasunit atsiorneqarpoq. Oqaaseqaat pingasunik quppernilik imatut oqariartuuteqarluni aallaartippoq:

”1973-imi nannut piujuartinneqarnisaannut isumaqatigiissummut atsioqataasunut sinniisuusugut, Moskvami, Ruslandimi decembarip 4-ani 2013, Nunat Tamalaat Akornanni Nannut Illersorneqarnissaat Pillugu Ataatsimeersuarnermi naapippugut. Isumaqatigiissutip ukiuni 40-ni atuussimanera naalagaaffiillu nanoqarfiusut, nunarsuarmi nannut pijuartinneqarnissaannut aqunneqarnissaannullu suleqatigiilluarsimanerat nalliussisipparput. 2013-imi Nunat Tamalaat Akornanni Nannut Illersorneqarnissaat Pillugu Ataatsimeersuarnermi tapersiissutigineqartut nuannaarutigaagut iluunngarlutalu pingaartillutigit. Pisimasut ataqqillugit siunissarlu eqqarsaatigalugu:
SIUNERSIVARPUT nunat nanoqarfiusut taakkuusut taakkuusariaqartullu oqartussaaffimminni nannunit aqutsisussat illersuisussallu;
AKUERSAARPARPUT nannunik piujuartitsinermi ilisimatusaarnermillu qularnaarinissarput ataatsimullu suliniutigisagut ataatsimoorluta akisussaaffigigatsigit;”

Ministerit ataatsimiinneranni oqariartuutima pingaarnersaraat nannunniarnermi nungukkiartuutaanngitsumik atuinerup eqqanaarneqarnissaa, aammalu aalajangersaanerit biologit inassuteqaataannik aammalu atuisut ilisimasaannik aallaveqarnissaat kiisalu Nunatsinni silaannaap allanngornerani nanoqatigiinnut inuuniarfiinullu sunniutaasinnaasut eqqumaffigineqartut aammalu eqqumaffigineqassasut. Aammattaaq naqissuserpara inuuniarnikkut, aningaasaqarniarnikkut aammalu kulturikkut uagutsinnut kalaallinut nannut qanoq pingaaruteqartigineri.

Isumaqatigiissutip ulluinnarni aqutsinermi atuutilersinniarlugu ukiuni kingullerni 10-ni suliarineqarsimasut nalilersorneqarnerisa saniatigut, ukiuni 10-ni tulliuttuni nannunik iluaquteqarnermi illersuinermilu suleriarnissamut pilersaarutissaq aallaavigalugu, isumaqatigiissutip atuutilersinniarnerani suut pingaarnersiorlugit suliniutigineqarnissaat nalunaarutigineqarput.

Nalunaarut Kalaallisut

Nalunaarut Tuluttut