Mittarfeqarfiit akigititanik qaffaassanngilaq 2014-mi

Peqqissutsimut Attaveqarnermullu Naalakkersuisup Steen Lyngep nuannaarutigalugu nalunaarutigissavaa, Mittarfeqarfiit ukiuni arlaqartuni qaffaasareerluni siullermeerluni akigititanik qaffaassanngimmat, ilaasartut timmisartuussisartullu akilertagaannik heliportit mittarfiillu atornerinut.

”Sipaarniarnikkut aaqqissuussinikkullu Mittarfeqarfiit siulersuisuisa aningaasartuutit qaffakkiartortut matussusersinnaasimavaat, akigititanik qaffaanngikkaluarluni. Kiisalu aamma kaajallaalluni timmisartornermi akigititat appartinneqarput. Ataatsimut inernera assut iluarisimaarpara” oqaaseqarpoq Steen Lynge Peqqissutsimut Attaveqarnermullu Naalakkersuisoq.

Mittarfeqarfiit Akigititanut Akiliinernullu malittarisassaasa akuerineqaqqammersup Naalakkersuisoqatigiit Kalaallit Nunaanni takornariaqarnermut atugassarititaasunik pitsanngorsaarusunnerat naqissuserpaa. Kaajallaalluni timmisartornermi akigititat appartinneqarnerisigut, taannalu takornarissanut angallassisartut tuniniagaasa ilagaat.

”Pingaartippara inuussutissarsiorneq tapersersussallugu, nuannaarutigaaralu maanna takornarissat nunatsinnut tikittartussat suli pitsaanerusumik periarfissikkatsigit” naggasiivoq Steen Lynge.