Kalaallit Nunaata EU-llu aalisarneq pillugu isumaqatiginninniarnerat

Kalaallit Nunaata EU-llu 2014-imut aalisarneq pillugu isumaqatigiissuteqarnerisigut Aalisarnermut, Piniarnermut Nunalerinermullu Naalakkersuisoqarfiup EU-mik ukiumoortumik isumaqatiginninniarneq naammassivaa.

Isumaqatigiissut europamiut aalisartut 2014-imi nunatta imartaani aalisarnissaannut tunngaviliivoq. Isumaqatigiissutip tunngavigaa Aalisarneq pillugu 2013-2015-imut isumaqatigiissut Kalaallit Nunaata EU-llu akornanni aalisarneq pillugu isumaqatigiissummut ilaasoq.

Kalaallit Nunaata EU-llu 2014-imi aalisarnikkut attaveqaqatigiinnissaq pillugu isumaqatiginninniarnerat ulluni 27.-29. november 2013 Bruxellesimi atorfilittanit ingerlanneqarput, isumaqatiginninniartunullu tamanut naammaginartumik isumaqatigiissuteqarlutik.

Isumaqatigiissut aalisarneq pillugu 2013-2015-imut isumaqatigiissummi aalisarneqarsinnaasutut aalajangersakkat 2014-imut tunngatillugu imatut allannguutitallit nanginnerivaat: EU-p Tunumi raajartarsat 1.000 tonsinik ikilisitat pissarsiarai, tassa EU 2014-imi 6.500 tonsinik raajartassaqalerpoq. Taakkua saniatigut EU-p saattuartassai 50 tonsinik ikilineqarput, tassa EU saattuanik 200 tonsit angullugit annertussusilinnik aalisarsinnaavoq. Taarsiullugu EU Tunumi qaleralittassami qaavigisigut 150 tonsinik tunineqarpoq, tassa EU Tunumi 4.465 tonsit angullugit qaleralinniarsinnaavoq. Piffissamili tamatumani EU ammassanniarnissamut neqeroorummik tigusisinnaanngilaq, taakkunanngali aalisarsinnaaneq 2014-imi upernaakkut tullissaanik ataatsimiinnermi oqaluuserineqassaaq.

Kalaallit Nunaata EU-llu akornanni aalisarneq pillugu isumaqatigiissut ilaatigut akiliuteqarnikkut aalisarneq pillugu isumaqatigiissutaavoq ilaatigullu aalisarnermi peqatigiinnissamik isumaqatigiissutaalluni. Akiliuteqarluni aalisarnissami nunatta imartaani EU-p aalisagartassaqartinneqarnera pineqarpoq, peqatigiinnissamillu isumaqatigiissummi nunatta aalisarnikkut ineriartortinneqarnissaanut tapiissuteqqarnissaq pineqarluni. Isumaqatigiissut illuatungeriinnut annertuumik naleqarpoq, EU-millu isumaqatigiissutaasoq inaarutaasumik akuerisassanngorlugu Aalisarnermut, Piniarnermut Nunalerinermullu Naalakkersuisumut kingusinnerusukkut saqqummiunneqassaaq.

EU-p Kalaallillu Nunaata 2013-2015-imut Isumaqatigiissutaanni aalisarneqarsinnaasutut isumaqatigiissutaasut 

Aalisakkat 2013 2014 2015
Saarulliit (NAFO 0/1)   2.200 2.200 2.200
Suluppaakkat ikerinnarsiortut (ICES XIV/V) 3.000 3.000 3.000
Suluppaakkat natersiortut (ICES XIV/V) 2.000 2.000 2.000
Qalerallit (NAFO 0/1) – 68° kujataani 2.500 2.500 2.500
Qalerallit (ICES XIV/V) 4.315 4.315 4.315
Raajat (NAFO 0/1) 3.400 3.400 3.400
Raajat (ICES XIV/V) 7.500 7.500 7.500
Nataarnat (NAFO 0/1) 200 200 200
Nataarnat (ICES XIV/V) 200 200 200
Ammassaat (ICES XIV/V) 60.000 60.000 60.000
Saattuat (NAFO 0/1) 250 250 250
Imminnguit (NAFO 0/1) 100 100 100
Imminnguit(ICES XIV/V) 100 100 100

(NAFO Kitaatut ICES-ilu Tunutut paasineqassapput)