Sukkornermik nappaateqarnerup kinguneqarluartumik suussusersineqartarnera

Pinaveersaartitsinermut atatillugu nakorsaaneq misissueriaatsillu pitsaanerulernerat pissutaallutik ukiut tallimat matuma siornamut sanilliullugit, sukkornermik nappaateqartut peqqinnissaqarfimmit paasineqartalersut amerlipput. 2008-miit nuna tamakkerlugu sukkornermik nappaatillit 500-niit 1000-inut amerlipput.

Sukkorneq paasineqanngitsoq
Sukkornermik nappaatillit amerliartoraluit, inuit amerlasuut sukkornertik sianiginagu angalaarput. Taamaasillutik sukkornermik nappaataat suussusersineqarsimasut, innuttaasut peqqissusaannik misissuisitsinerni takutinneqartunut sanilliullugit suli annikinneroqaat. Sukkornerup imm. aappaata
(type 2) ersarissunik ersiuteqarani kigaatsumik pinngoriartuaarajunnera tamatumunnga patsisaavoq, taamaammat ukiuni arlaqartuni sukkortut suli amerliartornissaat naatsorsuutigisariaqarpoq.

Amerlinerinik ersersitsineq ajunngitsoq
Amerlinerat nunatsinni peqqinnissaqarfimmi nappaammik suussusersiniaanerup eqiingasumik ingerlanneqarneranut takussutissatut isigisariaqarpoq. Sukkorneq innuttaasut akornanni peqqinnissaqarfimmilu annertuumik sammineqarpoq, 2010-miillu nappaammik suussusersiniaanermi periuseq nutaaq atorneqalermat, nappaammik suussusersiniaaneq ajornannginnerulerpoq. Nappaammik suussusersiaartalerneq sukkortullu ukiut inuuffigisartagaasa amerlinerat, sukkornermik nappaatillit amerlinerannut pisooqataasinnaavortaaq.

Nakorsap Michael Lynge Pedersen-ip sukkornermik nappaatillit amerlinerat ajunngitsutut isigaa.
Ullumikkut sukkornermik nappaatillit amerlanerusut paasineqarnerisigut pilertornerusumik pinaveersaartitsinerit- nakorsaanikkut allatigullu- aallartissinnaanerat nuannaarutigaara.

Sukkornermut kingunerluutitut nappaatigineqalersartunik pinaveersaartitsineq
Sukkornermik nappaateqalernerup nappaatit malitsigisartagai pinaveersaartinniarlugit, peqqinnissaqarfimmit aaqqissuussamik malittarineqarluni kingunerluuteqarfiusartunut - ass. isit, tartut isikkallu - misissorneqarnissaat neqeroorutaavoq. Sukkornermik nappaateqartuulluni peqqinnissaqarfimmit neqeroorutaasunik atuinissaq, timimik atuinissaq tupatunnginnissarlu pingaaruteqarput.

Paasissutissat
Paasissutissat sukumiinerusut nakorsaq Michael Lynge Pedersen qarasaasiakkut milp@peqqik.gl imal. oqarasuaatikkut 34 44 43 attavigalugu pissarsiarineqarsinnaapput.