Atuarfimmi pulaarneq

Atuartup ilikkagaqarnissaa aamma ingerlalluarnissaa Sisimiuni Nalunnguarfiup Atuarfiani qitiutinneqarput

Sisamanngorneq decembarip ulluisa tallimaanni 2013 Sisimiuni Nalunnguarfiup Atuarfiani (NA) pisortaasut ilinniartitsisullu atuarfiup ineriartortinneranut suliaminnik Nick Nielsenimut, Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisumut saqqummiussipput.

Nick Nielsen tamatumunnga atatillugu oqaaseqarpoq: ”Ilinniartitsisut, pisortat aamma NA-mi sulisut allat meeqqat atuarfiat pillugu Inatsisartut inatsisaata piviusunngortikkiartuaarnissaanut namminneq aqqutissartik nassaarisimavaat. Ilinniartitsisut tamarmik pisortallu suleqatigiillutik aaqqissuusseqqinneq piviusunngortikkiartuaarpaat. Tamarmik akisussaaffik tiguaat, aammalu atuarfimmi inunnik piginnaanilinnik allanik sulisoqarpoq, taakkualu ilinniartitsisunut atuartunullu ulluinnarni tapertaapput. Kiisalu atuartut sumiginnarneqarsimasut aamma immikkut isumagineqartarput, angajoqqaat, ilinniartitsisut kommunillu suleqatigiinnerisigut.”

Ilinniartitsisut atuarfimmi atuartut amerlanersaat klassip sulinerani peqataatippaat. Piffissat ilaanni atuartut ikittunnguakkaarlugit atuartinneqartarput, taamatullu aaqqissuussinikkut atuartut immikkut pisariaqartitsisut piffissaqarfigineqartarput. Ilinniartitsisut suleqatigiiaakkaarlutik sulipput, aammalu ilinniartitsisut fagit assigiinngitsut akimorlugit alloriarfiillu akimorlugit suleqatigiinnermik ingerlatsipput.

Nick Nielsen eqikkaavoq: ”NA-mi ilinniartitsisut pisortallu piumassuseqarluarlutik sulinerat assut ataqqivara. Assut nuannerpoq atuarfimmi susassaqartut tamarmik akisussaaffimmik tigusimmata”.