Kalaallit Nunaata Washington D.C.-mi sinniisoqarfiani pisortassamik toqqaaneq

Nunanut allanut tunngasunut Naalakkersuisup aalajangerpaa Nunanut Allanut Ministe-reqarfimmi siunnersortit pisortaat, siornatigut nunanut allanut pisortaqarfimmi pisort-aasimasoq Inuuteq Holm Olsen Namminersornerullutik Oqartussat Washington-imi Sinniisoqarfianni pisortatut aallartinneqassasoq piffissami 1. januar 2014-miit 31. juli 2019-ip tungaanut.

Aleqa Hammondip oqaatigaa:

Assut nuannaarutigaara 2014-mi aningaasanut inatsimmi Washington D.C.-mi Sinniisoqarfissamut aningaasaliisoqarmat qallunaat nunaata aallartitaqarfiani inissisi-masussamik.

Sinniisoqarfimmi pisortap januarip aallaqqaataani 2014-mi sulinini aallartissavaa. Sinniisoqarfimmi pisortap suliassaraa soorlu ilaatigut suliffimmik nutaamik ineriartortitsi-nissaq USA-mik nalinginnaasumik naalakkersuinikkut attaveqaatinik ataavartitsinissaq patajaallisaanissarlu siunertaralugu, Kalaallit Nunaata USA-llu akornanni niuernikkut anin-gaasaqarnikkullu attuumassutilinnik patajaallisaanissaq kiisalu aatsitassarsiornikkut, suliffissuaqarnikkut, ilinniartitaanikkut, ilisimatusarnikkut, kulturikkut, nunat inoqqaavisa il.il. akornanni suleqatigiinnernik patajaallisaanissaq. Sinniisoqarfimmi pisortap aamma Canada-mut assingusumik aallartitatut akuerineqarnissaa siunertarineqarpoq, taamaalil-luni sulianut Canada-mut tunngasunut aallartitatut suliassat isumagilersinnaalissallugit. Sinniisoqarfiup Namminersorlutik Oqartussani naalakkersuisoqarfiit tamaasa sullittassa-vai.

Piumasaqaatinut tamakkununnga Inuuteq Holm Olsen tamakkiisumik naammassin-nippoq. Pineqartoq George Washington University Washington D.C.-mi nunani assigi-inngitsuni naalakkersuinikkut pissutsinut tunngasunut kandidatitut naammassinninnikuu-voq 1996-llu kingorna Namminersornerullutik Oqartussani Namminersorlutik Oqartussanilu sulisimalluni. Pineqartoq piffissami 1999-2000 Nunanut Allanut Ministe-reqarfimmut atukkiussatut sulisimavoq, tamatuma kingorna piffissami 2000-2003 Ka-laallit Nunaata Bruxelles-imi Sinniisoqarfiani ambassadesekretær-itut sulisimavoq. 2003-miit Nuummi Nunanut Allanut Pisortaqarfimmi sulivoq: Allaffimmi pisortatut 2003-08 (2004-2006 pisortatut ivertitaagallarpoq), 2008-13 pisortatut, 2013-mili Nunanut Allanut Ministereqarfimmi siunnersortit pisortaattut.

Pineqartoq taamaattumik pitsaanerpaanik tunngavissaqarpoq Washington-imi Kalaallit Nunaata Sinniisoqarfiani siullersaalluni pisortaanissaminut.