Avatangiisinik Pinngortitamillu Mianerinninneq pillugu Nersornaatip tunniunneqarnera

Mia Lindenhann-imut Ilulissaneersumut Avatangiisinik Pinngortitamillu Mianerinninneq pillugu Nersornaasiisoqassaaq Nuummi Hans Egedep illuani sapaatiuppat nal. 11.00-12.30 tassanilu tusagassiortut tikilluaqquneqarput.

Nersornaat 10.000 kr.-inik aningaasartaqarpoq ataani allassimasoq tunngavigalugu tunniunneqarluni:


“Arnat marluk suliniuteqarluartut, Mia Lindenhann qanittukkullu toqukkut qimaguttoq Betina Kristiansen, suliniaqatigiiffimmik ”Saligaanneq”-mik pilersitsinermikkut piffissap sivikitsup ingerlanerani attaveqariaatsit nutaat atorlugit nunaqqatitik meeqqat, inuusuttut utoqqaallu Ilulissani aallartisarsimavaat, sapaatip akunneranut ataasiarlutik naapittarnermikkut illoqarfiup saligaannerulernissaa anguniarlugu, taamaalillutillu illoqarfimminni nunatsinnilu eqqakkanik ajornartorsiuteqarnerup eqqumaffigineqarnerulerneranik pilersitsillutik.

Atsiornernittaaq katersisimapput illoqarfiit saligaannerunissaannik anguniagaqarlutik, atsiornerillu 1000-ngajaat pissarsiarisimallugit, taakkulu illoqarfimmi suliffiutilinnut eqqaasissutitut atorpaat suliffeqarfiutimik eqqaat saligaatsuuteqqullugit.

Kingullertullu facebook-ikkut suliniut pitsaasoq illoqarfinnut allanut annguppaat sinerissamilu assingusunik suliniaqatigiiffinnik aallartitsisoqarluni. Arnat taakku marluk qaammatialunnguit ingerlaneranni Ilulissat tukassimagaluartoq kusanartunngortippaat saligaatsunngortillugu nunatsinnilu eqqakkanik eqqarsartaaserput allanngortillugu.”

Inuit, suliffeqarfiit kattuffiilluunniit tamatsinnik pinngortitamik avatangiisimillu mianerin-ninnissatsinnik ilisimaarinnilersitsisut imaluunniit Kalaallit Nunaanni suliniuteqarnermikkut avatangiisitsinnik pitsanngorsaataasumik iliuuseqarsimasut nersorniarlugit nersornaat tunniunneqartarpoq.

Una 2013-imi nersornaatisisussat pingasuusut siullersaraat. Nersornaatisisussat allat kingusinnerusukkut nalunaarutigineqarumaarput.