Tanbreez

Kujataani Killavaat Alannguanni Tanbreez Mining-ip suliassaanut VVM-imut nassuiaammut oqaaseqaateqarnissamut tusarniaanermut piffissaliussamik sivitsuineq.

Tanbreez-ip suliassaanut avatangiisinut sunniutaasussat pillugit tamanut ammasumik tusarniaanermut soqutiginnittut arlallit – tusarniaanermut piffissaliussap naanissaa sioqqutitsiarlugu – tusarniaanermut piffissaliussamik sivitsuisoqarnissaanik qinnuiginnipput. Avatangiisinut sunniutaasussanik nassuiaammut tunngaviusut allakkiat aatsaat qanittumi ingerlatseqatigiiffimmit tamanut ammasumik saqqummiun-neqarnerat innersuussutigineqarpoq.

Naalakkersuisut ulloq 5. december 2013 qinnuiginninnerit taakkua akuerineqar-nissaannut tapersiipput, tusarniaanermut piffissamut killissaliussaq ulloq 6. januar 2014-imut sivitsorlugu.
Kim Kielsen, Avatangiisinut Pinngortitamullu Naalakkersuisoq Naalakkersuisut aalajangernerannut nangissutigalugu oqarpoq:

”Inuiaqatigiinni ineriartornermi minnerunngitsumillu aatsitassarsiornermut suliassani innuttaasunik peqataatitsinissaq pingaartikkatsigu, Naalakkersuisut aalajangernerannut ilaatigut tunngaviuvoq. Aatsitassarsiornermik suliassaq Kalaallit Nunaanni ineriartornermut annertuumik pingaaruteqartussaavoq. Taamaattumik innuttaasut, kattuffiit allallu inuiaqatigiit ineriartornerannut tassunga sunniuteqarnissaat aammalu eqeersimaartumik peqataa-nissaat kaammattuutigisariaqarparput. Taamatuttaaq sivitsuinissamik qinnuiginninnerit tiguneqartut, allakkiani tunngaviusuni aamma nalunaarusiani tekniskiusuni itisiliisumik aallussinissaminnik kissaateqarnermik tunngaveqarmata iluarisimaarparput.

Naalakkersuisut tusarniaanermut piffissaliussamik sivitsuinerat tamanna tunngavi-galugu isineqassaaq.”
Tusarniaanermut piffissaliussamik sivitsuinissaq pillugu kattuffiit qinnuiginnittut toqqaannartumik nalunaarfigineqareerput. Kisianni soorunami kikkut tamarmik 6. januar 2014 tungaanut Tanbreez-ip avatangiisinut sunniutaasussanut nassuiaataanut oqaaseqarnissamut suli periarfissaqarput. Taanna Namminersorlutik Oqartussat tusarniaanermut nittartagaanni, www.naalakkersuisut.gl, takuneqarsinnaavoq.