Sisimiuni illoqarfinni illunik nappaanersiorneq

Tallimanngormat decembarip ulluisa arfernanni illoqarfinni illut pingasut, Namminersorlutik Oqartussat Sisimiuni sanaartugaasa kingullersaat napparnersiorneqarpoq. Illoqarfinni illut tamarmik immikkut 12-inik attartortittakkanik inissiartaqarput. Tassalu tassani inissiat katillugit 36-it sananeqarnerat pineqarpoq.

Ineqarnermut Naalakkersuisoq Siverth K. Heilmann:

- Inissiaatinik iluarsaassinissamut nutarterinissamullu periarfissaqartoqarnissaa pingaartippara. Piffissap ingerlanerani illuutini pisoqaasuni arlalinni iluarsaassisoqartarsimavoq nutarterisoqartarsimallunilu. Kisiannili aamma illoqarfimmi illuutoqqanik isatereriarluni nutaanik sanaartorluni illoqarfiup immikkoortortaata ilaani nutarterissaq – pingaartumik inissiarsuarnik pisoqqanik qaqortunik aneerasaartarfiusalinnik – pingaaruteqarpoq. Inissiat nutaat sanaartorneqartut ullutsinnut naleqqussagaapput aamma inissianut attartortut piumasaannut, avatangiisinut inissiallu ilusilersugaanerinut piumasaqaatinut, kiisalu minnerunngitsumik atuinernik (kiassarneq, imeq allallu) uuttuinerit naapertorlugit akiliuteqartarnissamut naleqqussagaassapput.