Ukiuunerani tuttutassiissutit umimmattassiissutillu

2014-mi ukiuunerani piffissat piniarfiusussat tuttutassiissutit umimmattassiissutillu

Ukiuunerani 2014-imi piffissat piniarfiusussat tuttutassiissutit umimmattassiissutillu atuuttut piffissami 13. maj-imiit 17. Juni ilanngullugu 2013-imi tamanut tusarniutigineqareersut matumuuna APNN-imiit nalunaarutigineqarput.

Ukiuunerani tuttuniarneq
1. Ukiuunerani inuussutissarsiutigalugu akiliillunilu piniarneq: Nunap immikkoortua 10 (Prudhoe Land).
2. Ukiuunerani inuussutissarsiutigalugu, sunngiffimmi kiisalu akiliilluni piniarneq: Nunap immikkoortua 9 (Kangerluarsorujak) aamma Nunap immikkoortua 10 (Inglefield land).
3. Ukiuunerani akiliilluni piniarneq: Nunap immikkoortua 1 (Naternaq), Nunap immikkoortua 2, Nunap immikkoortua 3 (Akia-Maniitsoq), Nunap immikkoortua 4 (Ameralik), Nunap immikkoortua 6 (Qassit), Nunap immikkoortua 7 (Neria), Nunap immikkoortua 8 (Nuussuaq) kiisalu Ivittuut.

Erseqqissaatigineqassaaq ammasumik pisassiiffiunngitsuni 2013/2014-imut tuttutassiissutigineqartuniit sinneruttut taamaallaat pineqarmata. Qamuteralaat ATV-llu tuttunik malersuinermi piniarnermilu atornissaat inerteqqutaalluinnarpoq.

Ukiuunerani umimmanniarneq
4. Ukiuunerani inuussutissarsiutigalugu, sunngiffimmi kiisalu akiliilluni piniarneq: Sisimiut kiisalu Ittoqqortoormiit.
5. Ukiuunerani inuussutissarsiutigalugu sunngiffimmilu piniarneq: Inglefield Land aamma Kap Atholl.
6. Ukiuunerani inuussutissarsiutigalugu akiliillunilu piniarneq: Maniitsoq.
7. Ukiuunerani inuussutissarsiutigalugu piniarneq: Ivittuut.
8. Ukiuunerani akiliilluni piniarneq: Sigguk aamma Naternaq.

Erseqqissaatigineqassaaq ammasumik pisassiiffiunngitsuni 2013/2014-imut umimmattassiissutigineqartuniit sinneruttut taamaallaat pineqarmata. Umimmaqarfik Sisimiut eqqarsaatigalugu ukiuunerani inuussutissarsiutigalugu piniartunut sunngiffimmilu pinialuttartunut immikkut pisassiiffiuvoq. Qamuteralaat ATV-llu umimmannnik malersuinermi piniarnermilu atornissaat inerteqqutaalluinnarpoq.

Aallaaniarnissamut uppernarsaammut akiliinissamut atuuttumillu akuersissuteqarnissamut piumasaqaatit
Sumiiffiit ilaanni ammasumik pisassiissoqaraluartoq, piniarsinnaanissamut akuersissummik pigisaqartut tuttunnisaminnut umimmannissaminnullu akuersissummik peqartariaqarput. Taamaammat ammasumik pisassiiffiusut eqqarsaatigalugit aamma akuersissut kommuneqarfimmut qinnuteqaatigineqartariaqassaaq.

Nalunaaruteqartussaatitaaneq
Tuttut umimmaallu pisarineqartut akuersissutip tunuaniittumik immikkut immersugassakkut nalunaarsorneqassapput piniarfissap naammassereernerani kingusinnerpaamik sapaatip-akunnerit marluk qaangiutinnginnerini kommuneqarfigisamut utertinneqartussaq.

Ilanngussaq