Halifaximi tusagassiortunik katersuutsitsinermi videoliaq

Naalakkersuisut Siulittaasuata Aleqa Hammond-ip Halifax International Security Forum-imut atatillugu tusagassiortunik katersortitsinerata videoliarineqarnera

Naalakkersuisut Siulittaasuat Aleqa Hammond Halifax International Security Forum-imi ataatsimeersuarnermut 22.-24. novembari ingerlanneqartumi peqataanerminut atatillugu tusagassiortunik katersortitsivoq. Tusagassiortunik katersortitsinerup videoliarineqarnera maannakkut ataatsimeersuarnerup nittartagaanut ikkunneqarsimalerpoq. Tusagassiortunik katersortitsineq tuluttut ingerlanneqarpoq:

http://halifaxtheforum.org/2013-forum/session-recaps/

Halifax International Security Forum tassaavoq naalakkersuisunit, sakkutuunit, inuussutissarsiortunit, ilisimatusartunit tusagassiortuniillu aalajangiisartunut nunani tamalaani naapittarfik aammalu attaveqaqatigiiffik, siunertaalluni nunani tamalaani suleqatigiinnissaq, taamaalilluni ataatsimoorluni nunarsuarmi allanngorartuartumi siooranartunik annertuunik pakkersimaarinninniarnissaq.

Naalakkersuisut Siulittaasuat tusagassiortunik katersortitsinerup saniatigut, pingaartumik Halifax International Security Forum-imi ataatsimoorluni oqallitsitsinermi oqalliseqataalluni peqataavoq, tassani qulequttat arfiniliullutik ”Arctic Encounters: Hot Commodities, Cold War” oqallitsitsisuni peqatigalugit Canadap illersornissamut ministeria Rob Nicholson, Islandip nunanut allanut ministeria Gunnar Bragi Sveinsson aamma Danmarkip illersornissamut ministeria Nicolai Wammen. Ataatsimeersuarnermit aamma ataatsimoorluni oqallitsitsinermit assilisat videoliallu pissarsiarineqarsinnaapput uani:

http://halifaxtheforum.org/galleries/

Uataatsimeersuarnermi pisortatigoortumik oqallinnerit saniatigut Naalakkersuisut Siulittaasuat siusinnerusukkut Amerikami præsidentinngorniartuusimasoq Howard Dean aamma Canadap maannakkut USA-imut Ambassadøria Gary Doer peqatigalugit silap pissusaata allanngoriartornera pillugu 23. november matoqqasumik oqallinnermut peqataanissamut qaaqqusaavoq.

Naalakkersuisut Siulittaasuata tassani 2015-imi silap pissusaanut nunarsuarmi pimoorussisumik isumaqatigiissuteqarnissamut, nunarsuarmi gassinik silaannarmik kissatsitsisartunik annikillisitsisinnaasumut, tunngatillugu suliaqarnissamut nunat issittuniittut immikkut pisussaaffeqarnerannut, aammalu nunat issittuniittut aamma peqatigisaanik tamarmik immikkut suliffissuaqarnikkut suliaqarnerup ikummatissanik nunap iluaneersunik atuiffiusussaanngitsumik, pingaartumik issittumi nukissiamik ataavartumik atuinerup annertusitinneratigut, allanngortinnissaata qulakkeernissaanut qanoq aalajangersimasumik akisussaaffeqarnerannut Kalaallit Nunaata qanoq isumaqarnera saqqummiuppaa.

Ataatsimeersuarnermut 300-init amerlanerusut nunanit tamaaneersut peqataanissamut nalunaarsimapput, nunanit 50-init amerlanerusunit peqataasoqarluni. Oqalugiartut sinnerini ilaapput USA-mi aamma Canadami illersornissamut ministerit ataatsimeersuarnermik ammaasuusut.