Peqqinnissaqarfimmi aaqqissuussamik pinaveersaartitsineq annertusiartorpoq

Peqqinnissaqarfiup qitiusumik immikkoortuini tallimani sulisut annertuumik suliaqarnerisigut, nappaateqalersitsisinnaasunik pinaveersaartinneqarsinnaasunik- soorlu tupatornermik, aap taqqanut naqitsinerata qaffasippallaarneranik timimillu atuinnginnermik siusinaartumik paasiniaasarnerup patajaallisarniarneqarnera iluatsippoq.

Taamaasillutik inersimasut 24 %-iisa aap taqqanut naqitsinera misissortissimanerat, 17 %-illu tupatortuuneq pillugu nuna tamakkerlugu qarasaasiakkut allattugaatinut nalunaarneqarsimanerat, Inuunerissaavimmi naatsorsueqqissaarnermi kisitsisit takutippaat. Kisitsisit takku ukiut marluuk matuma siornamut sanilliullugit 300 %-inik siuariaateqarput. Tupatornerup aallu taqqanut naqitsinerata saniatigut, peqqissutsimut sunniuteqarsinnaasut allat ass. timip atornissaata oqimaassutsillu sammineqarnerat annertusivoq.

Peqqinnissaqarfimmi pinaveersaartitsineq
Tupatortut aallu taqqanut naqitsineranik qaffattoorsimasut nunatsinni akulikitsunik naammattuugassaap-put. Taakku marluk taqqat qalipperlutik qerattarnerannik, taqqanik milittoornermik aanaartoornermik/qaratsakkut taqqamik milittoornermik kinguneqarsinnaasarput. Tupatorunnaartoqarsinnaammat aallu taqqanut naqitsinera nakorsarneqarsinnaammat, peqqinnissamik sullissisut innuttaasullu ulorianaatinik takkunannga eqqummaariffiginninnissaat pingaaruteqarpoq.

-Suliniuteqarneq naatsumik oqaatigalugu, peqqinnissakkut sullissisut innuttaasumik naapitsinerminni peqqissutsimut tunngatillugu paasissutissanik katersisarput. Paasissutissat innuttaasumit peqqinnissakkullu sullissisumit takulertorneqarsinnaaqqullugit nappaateqalersinnaanermut patsisaasinnaasut qarasasiakkut allattugaatini, inooriaatsimut ilisarnaammik taaneqartartumi katersorneqartarput, nakorsaq Michael Lynge Pedersen nassuiaavoq.

Nappaateqalersitsisinnaasut qitiutillugit
Nappaateqalersitsisinnaasut allanngortinneqarsinnaasut takusinnaanissaat paasisinnaanissaallu alloriarneruvoq siulleq. Alloriarneq tulleq tassaasinnaavoq tupatorunnaarneq, timimik atuinerulerneq, oqilineq, pinaveersaartitsinermut atatillugu nakorsarneqarneq il.il.
Inooriaatsimik allannguiniarluni innutaasup kissaataa Peqqinnissaqarfimmit tapersersorneqarsinnaavoq ass. aap taqqanut naqitsinerata qaffasippallaaneranut sukkornermullu nakorsaanikkut.

-Tamatuma peqatigisaanik Kalaallit Nunaanni Peqqinnissaqarfimmi pinaveersaartitsineq peqqissuunissarlu anguniarlugu suliniuteqarneq kisimiillutik angusaqarfiusinnaannginnerat, inuilli namminneq toqqagaanik inuiaqatigiinnilu pissutsinik tunngassuteqarnera nassuerutigisariaqarparput. Kikkulluunniit peqqinnartumik inuuneqarnissamik toqaasinnaanissaat pingaaruteqarpoq, Michael Lynge Pedersen naggasiivoq.