Eqqiluisaarneq pillugu allagartartaarnissamut pikkorissarneq

”Eqqiluisaarneq nammineerlunilu nakkutilliinissamut pilersaarusiorneq
inuussutissanik siullertut tunisassiortunut" pillugu allagartartaarnissamut pikkorissarneq

Piniartut aamma aalisartut siulliit ulloq 5. december Nunatsinni Uumasut nakorsaqarfik Inuussutissalerinermullu Oqartussaaffiup (UNIO-p), Eqqiluisaarneq nammineerlunilu nakkutilliinissamut pilersaarusiorneq
inuussutissanik siullertut tunisassiortunut pillugu allagartartaarnissamut pikkorissaanerani angusipput. Pikkorissarneq Nuummi ingerlanneqarpoq.

Inuussutissanik siullertut tunisassiortutut akuerisatut aalisakkanik, uumasunik imarmiunik aamma uumasunik mikinerusunik, niuertarfinnut akuerisaasumik neqaarniarfimmik immikkoortortaqartunut, aalisartut piniartullu inatsisitigut akuerisamik pisaminnik tunisisinnaapput.

Ilinniartitsineq pikkorissarnerullu ingerlarnga UNIO-mit Inuussutissalerinermillu Ilinniarfiusumit INUILI-mit suleqatigiinnertigut ingerlanneqarpoq.

Kalaaliminernik nioqqutissiat niuertarfinni piumaneqarnerat annertusiartorpoq pikkorissartitsinerlu manna aqqutigalugu nutaanik isumannaatsunillu kalaaliminernik nioqqutissiassanik imminut pilersornerup annertusiartornissaa ammaanneqarpoq.

Juullertinnagu Eqqiluisaarneq Nammineerlunilu nakkutilliinissamut pilersaarusiorneq pillugu inuussutissanik siullertut tunisassiortunut Narsami allagartartaarnissamut pikkorissartitsineq ingerlanneqassaaq.

Pikkorissartitsinerit taakku marluk tassaapput UNIO-p inunnik inuussutissanik nioqquteqartartut immikkoortuini tamani sulisunik eqqiliuisaarnermik ilinniagaqartitsineq pillugu suliniutaat siulliit. INUILI suleqatigalugu pilersaarutigineqarpoq pikkorissartitsinernik immikkoortukkuutaartunik ineriartortitsinissaq, inuussutissanik aamma taakkuninnga nioqqutissiornernut tunngatillugu, Kalaallit Nunaanni pissutsinut immikkut ittumik naleqqussakkanik.
Pikkorissartitsineq siammarneqarnissaannut aamma ineriartorteqqinneqarnissaannut aningaasaliissutissanik ujarlertoqarpoq.

Eqqiluisaarnermik ilinnagaqartitsinissanut tunuliaqutaasoq tassaavoq tamaat sianigalugit silatuumik eqqarsarneq, Kalaallit Nunaanni inuussutissat pillugit inatsisiliornermi tunngaviusoq. UNIO´p kissaatigaa inuussutissat isumannaatsuunissaat pitsaasumik qaffasissusilimmik qularnaarneqassasoq, siullermik aaqqissuussinermik qajannaatsumik pilersitsinikkut inuussutissanik siullertut tunisassiortunik (piniartunik/aalisartunik) akuersissuteqartarnertigut, `Qaqqamit/Kangerlummit/Nunamit Nerrivimmut’ inuussutissat nioqqutigineqarnerini ingerlaarnerisa ilaattut.

Suliniutip nutaap tunngavianut ilaasumi pineqarpoq, peqqissuseq, inuussutissat aamma avatangiisit ataasiusutut ataqatigiinnerat. Nunat tamalaat akornanni tamanna taaneqartarpoq ‘One Health ‘ aamma Kalaallit Nunaat maanna tamatumunnga qanilleriarsimavoq, Kalaallit Nunaanni nioqqutissanik pilersuinerup immikkoortuinut tamanut ´One Health´-mik siammarterinikkut.

Kursister og undervisere
Pikkorissartut pikkorissaasullu