Appat pillugit oqallinneq pingaaruteqarpoq

Appat lomvier

 

All. Karl Lyberth, Aalisarnermut, Piniarnermut Nunalerinermullu Naalakkersuisoq

Piffissami kingullermi nalunngeqatigiinnissutitsinni appa initoqaaq - akuttunngitsumik raodiukkut sammineqartarpoq, aviisini maani nunatsinni nunanilu allani kiisalu Inatsisartuni oqallisigineqarluni. Soqutiginninnerulernermut tamatumunnga ilaavoq Nunatsinni appat ikiliartornerat pillugu Pinngortitalerffiup ilungersortumik nalunaarutaa, kisianni oqallinnerup ilarujussua aallaaveqarpoq nalinginnaasumik appa pillugu soqutiginninnermik. Oqallinnerup uppernarsarpaa, timmissap appap Nunatsinni uagutsinnut pingaaruteqarnera aamma oqallinnermi akerleriissumik tunngavilersuutit takutippaat appamut tunngatillugu soqutiginninnerit qanoq assigiinngitsiginerat. Oqallinneq pingaaruteqarpoq aamma isummanut assigiingitsunit inissaqartariaqarpoq.

Timmissani appa ilisimasaqarfigilluarnerpaavarput

Appa tassaavoq timmiaq piniarnermut atatillugu pingaarutilerujussuaq aamma timmissa-nit sisamaasunit piniarnermi pisassiissutaasartunut ilaasoq (appa, appa sigguttooq, miteq aamma miteq siorakitsoq). Timmissatut piniakkatut inissisimanera pillugu timmiaqatigiittut amerliartornerat malinnaaffiginissaat pingaaruteqarsimavoq aamma Pinngortitaleriffik appanut tunngatillugu annertuumik nalunaarsueriaaseqarpoq. Timmissat timmissat ineqarfiini kisinneqartarput aamma periaatsit atorneqartut nutaaliaapput misiligarluagaallutillu. Pinngortitaleriffimmi ilisimatusarnermik suliaqartut assersuutigalugu assiliivinnik timmissat ineqarfiinik nammineq assiliisinnaasunik atuisarput taamalu timmissat arlaleriarlutik assilineqarsinnaasarput aamma nalornisoqassagaluarpat inunnit/sulisunit assigiinngitsunit. Kisitsinerit ingerlanneqartarput ullup unnuallu ingerlanerani piffissami timmissat ineqarfiini timmissat ikinnerpaaffigisaanni, qummullu naqqiiffigineqartarlutik taamaalilluni timmissat amerlassusiinik inerniliinermi kukkusumik ikinaarisoqaqqunagu. Kisitsisit kukkuneq ajorput, appat amerlassusii taakkunannga kisitsinernik tunngaveqartut paasinarsisippaat qularnaateqanngitsoq, nunatta ilarujussuani appat ikileriarujussuarsimanerat. Appat ineqarfissui arlallit maanna timmiaarulluinnarsimapput. Aalisartut piniartullu amerlasuut suli eqqaamavaat appat ineqarfissuat Apparsuit Upernaviup eqqaaniittoq, 70-ikkut tikillugit timmiarpassuarnit ineqarfigineqartoq. Taamatuttaaq ippoq Salleq timmissat ineqarfiat Uummannap eqqaaniittoq, aatakkutta/aanakkutta nalaanni 40-kkunni suli 100.000-it qaangerlugit appanit piaaqqiorfigineqartoq. Maanna piaqqiorfiit taakku marluk timmiaarulluinnarsimapput aamma timmissat ineqarfii taamaattut sumiiffinni allani pilersimanngillat.


Kikkut pisuuppat?

Aalisakkanut qassutini saniatigut appat pisarisuukkat, timmissat ineqarfiini umiarsuarnit ingerlaartunit akornusersuinerit aamma pujortillugu siggartaatinik atuineq aamma qangaanerusoq helikopterit qanippallaarlutik ingerlaartarneri tamarmik appanut ajoqutaasimapput. Maanna Pinngortitaleriffiup mianersoqqussutigaa silaannaap allanngoriartornerata appat ukiuunerani neriniarfissaminnik ujaasisarnerminnut periarfissaanik ajornerulersitsinera, tamannalu ukiuunerani aniguisinnaanerannik sakkortuumik minnerulersitsissaaq. Piniartut teriannissat, tulukkat aamma naajat timmissat piaraannik manniinillu nerisaqartartut amerliartuinnarnerat nalunaarutigisarpaat.

Pisuusumik nassaarnissannut taarsiullugu aaqqiissutissamik nassaarnissara aallukku-sunneruvara. Umiarsuarnut aamma helikopterinut tunngasut kiisalu amerlasoorsuarnik saniatigut pisarisuuisarnerit aqussinnaalernikuuvagut. Pinngortitaq allanngortissinnaanngilarput - sila apereqqaarata allanngortarpoq aamma uumasut namminerminnut ajornannginnerpaaq atorlugu nerisassaminnik nassaarniartarput. Allanngortissinnaasarput ataasiinnaavoq tassalu immitsinnut allanngortinnissarput. Unioqqutitsisumik appanniartarnermut uppernarsaammik piginnittutut Pinngortitaleriffik kisimiinngilaq. Ukiut tamaasa piniarnermik nalunaarsuiffik PINIARNEQ-mi takuneqarsinnaasarpoq, piniagaaffiup avataani appanik pisaqartoqartarnera. Unioqqutitsisumik piniarneq tamanna appanut ajoqutaasorujussuuvoq aamma tamatta soqutigisariaqarparput unioqqutitsisumik piniartarnerup unitsinnissaa. Aamma eqqagassaatitsinnik passusisarnerput pitsaanerulersittariaqarparput, taamaliornitsigut naajat tulukkallu eqqagassaatigut nerrivittut atorunnaarniassammassuk. Taamaaliornitsigut amerliartornerat akiorsinnaavarput. Pinngortitaleriffiup uumassusillit pillugit siunnersuinermini kaammattuutigaa, appanik eqqissisitsilluinnarnissaq imaluunniit pisarisartakkagut ikilisinneqarnissaat. Tamanna Naalakkersuisut aalajangissavaat, Timmissat pillugit suleqatigiissitamit kaammattuutit ikiorsiullugit aaqqiissutissamik pitsaanerpaamik nassaarnikkut. Piviusuuvoq piniarnerup annertussusia taassatuaammat appanit tatineqareersunit tatisineq peersinnaasarput. Appaqassutsip navianartorsiorunnaarnissaanut ikiuutaasinnaanissaq piareersimaffigissavarput taamalu siunissami nungusaataanngitsumik appanniarsinnaaneq qularnaarlugu.