Karl Lyberth Kalaallit Nunaata Kujataani angalasoq

Aalisarnermut, Piniarnermut Nunalerinermullu Naalakkersuisoq, Karl Lyberth Kalaallit Nunaata Kujataani angalasoq.

Ulluni 9. decemberimiit ulloq 16. december ilanngullugu Karl Lyberth Qaqortumi, Nanortalimmilu angalavoq. Ajuusaarnaraluartumik silarlunnera peqqutigalugu Narsaq tikinngitsoorpaa. Angalanermini pingaarnertut illoqarfinni taaneqartuni aalisartut piniartullu peqatigiiffii taakkualu ilaasortarisai ataatsimeeqatigisarpai. Qaqortumiinnermi aammattaaq Savaatillit Peqatigiissut Suleqatigiiffiata (SPS) siulersuisui ataatsimeeqatigivai.

SPS-ip ataatsimeeqatiginerani pingaarnertut eqqartorneqarpoq assartuussisarnermi akitigitat qaffasippallaarnerujussui pingaartumik nerukkaatissanik aamma atortussanik tikisitsiniarnerni. Nunaatillit savaatillillu tunisassiortutut ingerlatsiniarneranni ataqatigiissagassaasinnaasut eqqartorneqartut ilagivaat tassungalu ilanngullugit radiukkut oqarasuaateqarnikkullu atassuteqaateqarnikkut pissutsit.

Qaqortumi tunitsiveqarniarneq pitsannguuteqaraluartoq aalisartut atortoqarniarnermikkut atugaat pitsanngorsagassaasorujussuupput. Tamannalu suliniutitut pingaartutut salliutitsisoqarnissaamik kissaate-qartoqarluni. Ukiaq manna saarulliit kangerlunni aalisarfiusartuni takkusimaalernerat malunnarpoq atortutigulli pitsanngorsaasoqanngippat iluaqutaasinnaaneri killilerujussuussaallutik. Tamatuma saniatigut suliniut ingerlanneqareersoq qassutikunik aalisaatikunillu allanik immami saliineq eqqartorneqarluni. Tamatumani suleqatigiittuusut kommune kujalleq aammalu Arctic Prime Fisheries aalisartullu suli suleqatigiinnerunissaat aalisartunit ujartorneqarpoq.

Nanortalimmi aalisartut ataatsimeeqatiginerani pingaarnertut oqariartu-utigineqarpoq atortutigut umiatsiaaqqatigullu atukkat ulorianarsiartuinnartutut taasariaqartut, taamaammallu kissaatigineqarluni immikkut ittumik Naalakkersuisut iliuuseqarsinnaanerannik suliniutissanik suleqatigiissutigalugu ingerlanneqarsinnaasunik aallarnisaasoqartariaqarneranik. Nanortallip eqqaa saarulliinnanngitsunik aalisagaqarmat aamma misileraasinnaanermut periarfissaqarluaraluarmat tamannattaaq Naalakker-suinikkut suliniutigineqassasoq oqariartuutigineqarluni.
Ilanngullugit eqqartukkat ilagivaat nunami piniagassanik aaqqissuussineq soorlu Umimmaat eqqarsaatigalugit pitsaanerusariaqartoq umimmanniartarfiit orninniartarneranut isorartuumik ingerlaveqaqqaartigani tikitassaasanngitsuuummata. Kissaatigineqarpoq suliaq qangarsuummalli eqqartorneqartuartoq tassalu umimmannik nunalittoqartitsiniarnermik suliniut qaqileqqillugu ingerlanneqartariaqarneranik, tassami nunat naggorissorsuit uumasunut neriniarfiulluarsinnaasut pigineqareermata atorluarneqartariaqaraluartunik.

Appat pillugit piffinni tamaginni eqqartorneqartarputtaaq. Piniartut oqari-artuutigivaat avatiminni apparpassuaqartoq aammalu arferit amerlasoorsuusut. Taamaattoqarnerata nalorninaatsumik piniartut assigiissumik oqariartuuteqarput immap sarfaata ingerlaarnerisa nikeriaallattarnerisa avatiminni nerisassaqarluartitsimmata uumasut takanani neriniartuartuusut. Taamaammat pingaartumik appat eqqarsaatigalugit nungulerneqanngilluinnartut piniartut isumaqatigiilluinnarlutik oqariartuuteqarput. Taamatullu mitit (Aavuut) aamma amerlasoorsuullutik takussaasut oqaatigineqarluni.

Kujataani angalaninni ataatsimut isigalugu Aalisarnermut, Piniarnermut Nunalerinermullu Naalakkersuisoq, Karl Lyberth naliliivoq, neriuute-qarluarluni piumassuseqartoqarmallu suleqatigiinnikkut pissutsinik aaqqissueqatigiissinnaanermik. Karl Lyberth oqarpoq: “Ersarippoq aalisakkat pingaartumik saarullik pisarineqartarneri annertusiartulersut, taamaammallu pingaaruteqaqaaq atortutigut pitsaanngorsaateqarsinnaaneq suli annertunerusumik ukkallugu ingerlanneqartariaqarneranik suliniuteqartariaqartut, immallu qassutikunik saliigivineqarnera ingerlatiinnarneqassasoq. Ningittakkat assorsuaq iluarisimaarneqarmata nuannaarutissaavoq taamaammallu aamma tassunga tunngaatigut ikiorsiisinnaanernik suliniuteqarsinnaaneq aalisartut kattuffiallu suleqatigiinnikkut aaqqissuussassaasoq nalilerpara. Tunitsiveqarniarneq suli pitsanngorsarneqartariaqarneranik oqariartuuteqartarnera aamma nam-mineq takullugu malugivara suli pitsaanerusariaqartut, taamaammallu tunitsivinnik piginnittuusut atassuteqarfigeqqissavakka suliniutinut ingerlatsineri annertusarneqarsinnaannginnersut,” Karl Lyberth naggasiilluni oqarpoq.

 

Inussiarnersumik inuulluaqqusilluta 


Jørgen Isak Olsen
Toqq/direkte 345308
jio@nanoq.gl