Greenland Day Perth-imi

Kalaallit Nunaanni aatsitassat pillugit pilerisaarisarneq annertusarneqassaaq

 

Australiami pilerisaarineq ”Greenland Day in Perth” sapaatip akunnerata siuliani ingerlanneqarpoq. Tassani australiamiut aatsitassanik misissuinermik ingerlatsisartut 20t Kalaallit Nunaanni aatsitassat pillugit aamma misissuinissamut periutsit pillugit paasisaqarnissaminnut soqutiginnittut peqataapput.

Pilerisaarinerlu Inuussutissarsiornermut Aatsitassaqarnermut Suliffeqarnermullu Naalakkersuisoqarfimmi ujarassiuunit suliarineqarpoq.

”Kalaallit Nunaat pillugu ilisimasat annertusartuarniarlugit Australiami pilerisaarisarnerit ingerlattuartarnissaat pingaaruteqarpoq. Nunarsuarmi aatsitassanik misissuilluni ingerlatsisarnerit ikiliartorneri suli malunnaateqarpoq, nunallu assigiinngitsut aningaasaliisussanut pilerisaarillutik unammilleqatigiinnerat annertuvoq, taamaattumik pingaaruteqarpoq tuniniaaffiit aamma ingerlatsiviit Kalaallit Nunaanni misissueqqissaarnissamik soqutigisaqartut immikkut sammissallugit”, Inuussutissarsiornermut Aatsitassanullu Naalakkersuisoq Jens-Erik Kirkegaard oqarpoq nangillunilu: 

”Nunani allaneersunut aningaasaliisartunut pilerisaarisarneq 2014-imi annertusarneqassaaq, Canadami, Korea Kujallermi, Kinami, USAmi aamma Japanimi pilerisaarinerit ingerlanneqassamaarput”.

Australiamiut tassaapput Kalaallit Nunaanni aatsitassanik misissuinermik suliaqarnerpaat. Kalaallit Nunaanni misissuinermik ingerlataqartut 28% australiamiuupput, australiamiullu Kalaallit Nunaanni amerlanerpaanik ingerlatseqatigiiffiuteqarput.

Australiami pilerisaarineq aatsitassat pillugit periusissamut 2009-meersumut atavoq, Kalaallit Nunaata aningaasaliisartunut pilerinarsarneqarnissaa periusissiami siunertarineqarpoq.

Australiap kitaani provinsimi illoqarfiit annerpaartaanni Perthimi 2010-miilli ukiumoortumik pilerisaarisarneq ingerlanneqartarpoq, tassani siunertarineqarluni australimiut misissuinermik ingerlatsisartut aningaasaliinissaannut soqutiginnilersitsinissaq.

 

 

Annerusumik paasisaqarusukkaanni attavissaq:

Inuussutissarsiornermut, Aatsitassaqarnermut Suliffeqarnermullu Naalakkersuisoqarfimmi paasissutissiissartoq, Oline Inuusuttoq Olsen

telefon: +299 34 56 56 e-mail: oiol@nanoq.gl