Qimmeq qimuttoq pigiinnarneqassaaq illersorneqarlunilu

Kalaallit Nunaanni Qimussertartut Kattuffiat, KNQK, ulluni makkuni Ilulissani isumasioqatigiissitsivoq Naalakkersuisut Siulittaasuannit najuuffigineqartumik.

Qulequtaq pingaarneq tassaavoq qimmit qimuttut ikiliartornerat qanoq unitsinniarneqarsinnaanersoq.

Naalakkersuisut Siulittaasuat Aleqa Hammond:
- Qimmeq qimuttoq oqaluttuarisaanitsinnut kulturitsinnullu ilaavoq. Taamaattumik qimmeq qimuttoq pigiuaannartariaqarparput, aammalu pigiuaannassagutsigu piumassuseqartariaqarput allaanerusumik atorsinnaanerata ineriartortinnissaanut. Akuerisariaqarparput qamuteralaat atorneqarnerulersimammata, piniarnermik aalisarnermillu inuussutissarsiuteqarnerup allanngorsimanera, aammalu piniarnikkut aalisarnikkullu qimminut nerukkaatissanik pissarsisinnaanngikkaani qimmiuteqarnerup akisunerulersimanera. Qularutiginngilara kulturitta nukittuujunera ineriartorsinnaaneralu aammalu qimmit qimuttut atorneqartarnerannut periarfissanik nutaanik peqarnera. Tulluussimaarutigissavarput qimminik taama immikkuullaritsigisunik nunatsinni peqarata, aammalu pigiinnarnissaannut illersornissaannullu ataatsimoorluta periarfissarsiuussisinnaagatta.

Ilulissaniinnermini Naalakkersuisut Siulittaasuat qimussiunneqarpoq, qimussiuussisuulluni qimussernerup silarsuaani ilisarisimaneqarluartumik ullumilu 68-nik ukioqalerluni inuuissiortumit Wille Siegstadimit.



Aleqa Hammond Avanaata Qimussersuanut illersuisuuvoq.