Nunatta aamma Savalimmiut suleqatigiinnerat nukittorsarneqarpoq

Aleqa Hammond holder pressemøde

Naalakkersuisut Siulittaasuat Aleqa Hammond ulluni makkunani tikeraarluni Savalimmiuniippoq. Naalakkersuisunut siulitaasunngoramili aatsaat siullermeertumik Savalimmiunut tikeraarpoq.

 

Naalakkersuisut Siulittaasuat aamma Savalimmiuni lagmand Kaj Leo Holm Johannesen ippassaq ataatsimeeqatigiipput, tassani suliat ataatsimoorlutik soqutigisatik oqaluuseralugit. Ilaatigut suliassaqarfinni arlalinni Savalimmiut aamma Kalaallit Nunaata akornanni nukittunerusumik pisortatigoornerusumillu suleqatigilernissaq oqaloqatigiissutigaat, ilanngullugu Issittuni Siunnersuisooqatigiinni aamma nunani killerni avannarlerni, tassani nukittunerusumik ataqatigiissaarinermi nunat marluusut taakkua maannakkornit suliniarnerat nukittunerulersinneqarsinnaassalluni. Aamma Naalagaaffeqatigiinnerup ineriartorneranut tunngatillugu Savalimmiut aamma Kalaallit Nunaata periarfissat unammilligassallu ingerlaavartumik oqaloqatigiissutigisarnissaat pingaaruteqarpoq.

Suleqatigiinneq nutaaq politikkikkut naalakkersuisunut siulittaasut marluk taakkua akornanni ukiumoortumik aalajangersimanerusumik ataatsimeeqatigiittarnikkut ingerlanneqassaaq kiisalu atorfilittat akornanni Savalimmiut aamma Kalaallit Nunaata akornanni atorfilittat misilittagaannik paarlaasseqatigiittarnissaq pingartinneqarnerulissalluni.

Aamma EU-mut attaveqarnermut, Savalimmiut ammassassuarniarnerup iluani suli annertuunik unammilligassaqarluni misigisaqarfigisagaanut tunngatillugu oqaloqatigiinnissaq piffissaqarfigineqarpoq. Naalakkersuisut Siulittaasuat Bruxelles-imi OLT-mi ministerit ataatsimiinnerat naammasseqqammersoq pillugu ilisimatitsissuteqarpoq.

Qaninnerusumik suleqatigiinneq Savalimmiuni aamma Kalaallit Nunaanni inuussutissarsiortunut iluaqutaassaaq.

Naalakkersuisut Siulittaasuat Aleqa Hammond ataatsimeereernerup kingorna oqarpoq:
“Kalaallit Nunaata aamma Savalimmiut akornanni pisortatigoornerusumik suleqatigiinnerup aallartinneqarnissaa ullumi isumaqatigiissutigiissutigisinnaagatsigu nuannaarutigisorujussuuara. Suliassaqarfippassuuppoq Kalaallit Nunaata aamma Savalimmiut ingerlaavartumik ataatsimoorfigisinnaasaat. Ataatsimoorluta allorissaaqatigiilluta nukittorsaqatigiissinnaalluta, kisiannili aamma nunat marluk taakkua suliassaqarfinni tamarmik immikkut nukittuneruffigisaminni tapersersoqatigiissinnaallutik.

Pingaarnerisiuinitsinnik ataqatigiissaarinissarput pingaaruteqarpoq, taamaalilluni Kalaallit Nunaannut tamanna iluaqutaasinnaalluni, kisiannili aamma peqatigisaanik Savalimmiunut iluaqutaassalluni.”

Lagmand Kaj Leo Holm Johannesen ataatsimeereernerup kingorna oqarpoq:
“Ippassaq ataatsimiinnerput ukiuni aggersuni lagmand-ip aamma Naalakkersuisut Siulittaasuata akornanni pisortatigoornerusumik ataatsimeeqatigiinnerit siullersarigaat neriunarpoq.

Savalimmiut aamma Kalaallit Nunaat suliassaqarfippassuarni assigiinnik unammilligassaqarput, aammalu nukittunerusumik suleqatigiinnermi nunat marluusut taakku nukittorsarneqassapput.

Kalaallit Nunaat ullumikkut nunani tamalaani politikkikkut sammineqarpoq, taamaattumillu qaninnerusumik suleqatigiinnermi matut amerlanerusut ammarneqartussaapput – minnerunngitsumik inuussutissarsiortortatsinnut.”

Savalimiuni tv-imi apersuineq

Tikeraarnermut atatillugu Naalakkersuisut Siulittaasuat Naalakkersuisut aallakaatitami ”Vangamynd” (Ilisarititsineq) Savalimmiuni tamanut tv-eqarfimmi KVF-imi apersorneqarpoq.

Apersuineq danskisut ingerlanneqarpoq aammalu tamakkiisunngorlugu takuneqarsinnaalluni uani:

http://kvf.fo/netvarp/sv/2013/12/06/vangamyndin