ATV-nik unioqqutitsilluni atuineq

Ulovlig moskusjagt

Kangerlussuarmi umimmanniarnermut atatillugu ATV-nik unioqqutitsilluni atuineq

Kangerlussuup eqqaani umimmanniarnermut atatillugu inuussutissarsiutigalugu piniartut arlallit politiinut unnerluutigineqarsimapput unioqqutitsillutik ATV-nik (qamutit motoorillit sisamanik assakaasullit aqqusineqanngitsukkut ingerlasinnaasut) piniarnermut atatillugu atuisimaneri pillugit. Piniarnermut aalisarnermullu nakkutilliisup, oktobarip naalernerani Qinnguata Kuussuata eqqaaniittup, takusimavai ATV-nik ingerlaartut kalitalerlutik. Taakku assartuinissanut aqqutissat akuerineqarsimasut ungataanni kilometerinik arlalinnik ungasissuteqartumi piniarsimapput.
Pineqartut qamutit motoorillit umimmannik piniagassaminnik ujaasinernut pisaminnillu assartuinernut atortarsimavaat. Ilaasa ATV-t atorsimavaat umimmannik ungoorinernut piniarnernullu allaallu ATV-t uumasut tikivillugit piniarnerninut atortarsimallugit. Taamatut atuisinnaaneq inerteqqutaavoq. Qinnguata Kuussuata eqqaanni assartuinissamut aqqutissiat avataanni ATV-t atorlugit piniarnerup inerteqqutaanera pillugu aalisarnermut piniarnermullu nakkutillisumit erseqqissaaffigineqareeraluarlutik piniartut pineqartut tamarmik piniarnertik ingerlatiinnarsimavaat.
Naalakkersuisoqarfiup naatsorsuutigaa umimmaat 100-t 200-llu akornanni amerlassusillit inunnit pineqartunit ullut 14-it ingerlanerini pisarineqarsimassasut.
Kangerlussuarmi unioqqutitsilluni ATV-nik atuisarneq annertusiartortoq Naalakkersuisoqarfimmit isumakulunnartutut isigineqarpoq tamatumalu kingunerisaanik siunissami nakkutilliisarnerit annertusiniarneqalerlutik. Ilutigalugu piniartut allallu Naalakkersuisoqarfimmit kaammattorneqarput piniarnermi aallaaniarnermilu unioqqutitsinernik maluginiagaqaraangamik piaartumik aalisarnermut piniarnermullu nakkutilliisumut nalunaarutigisaqqullugit, ajornanngippallu pisut assilillugilluunniit filmiliarisaqqullugit pisullu nalunaarutigalugit, taamaasiortoqarneratigut unioqqutitsisarnerit unitsinneqarsinnaassammata inatsisinillu unioqqutitsisut politinut unnerluutigineqarlutik.