Nunat Avannarliit Siunnersuisooqatigiinnit

Nunat Avannarliit Siunnersuisooqatigiivisa katersuunnerat – kulturikkut nersornaatinik tunniussineq aammalu Norge-mi naalakkersuisortaanik ataatsimeeqateqarneq.

Asseq: Nordisk Rådip præsidentia Bertil Haarder, Nuka K. Godtfredsen aamma Aleqa Hammond.

Naalakkersuisut Siulittaasuat Nunat Avannarliit Siunnersuisooqatigiivisa 65-saanik oktoberip 28-aniit 31-annut Oslo-mi katersuunneranni peqataavoq. Nunat Avannarliit Siunnersuisooqatigiivi pingasunngornermi Oslo-mi Opera-mi toqqaannartumik aallakaatinneqartumi persuarsiutigalugu kulturikkut nersornaatinik pingaarutilinnik tunniussipput. Kalaallit Nunaannit Marianne Petersen taalliorluni atuakkiaminut ’Piniartorsuit kinguaavi’ pillugu atuakkiortunut nersornaammik tigusisussatut siunnersuutigineqarsimavoq aammalu Nuka K. Godtfredsen Martin Appelt-ilu titartagaliamut ’Hermelinen’ pillugu meeqqanut inuusuttunullu atuakkiornermut nersornaammik tigusisussatut siunnersuutigineqarsimapput.

Nersornaatit taakku tallimat ukioq manna Danmark-imeersunut Finland-imeersunullu tunniunneqarput. Dansk/norskip Kim Leine-p atuakkiani ’Profeterne i Evighedsfjorden’ pillugu Nunat Avannarliit Siunnersuisooqatigiivisa atuakkiortunut nersornaasiuttagaa pissarsiaraa, nersornaammillu tunniussinermut atatillugu qujalluni oqaaseqarnermini immikkut Kalaallit Nunaat kalaallisut oqalulluni qujaniarfigaa. Kalaallit Nunat Avannarliit Siunnersuisooqatigiivisa nersornaasiuttagaanut siunnersuutigineqarsimasut pisut kingorna Naalakkersuisunut Siulittaasup qaaqqusinerani katerisimaarnermut qaaqquneqarput.

”Soorunami uggoraara ukioq manna Kalaallit Nunaanneersunut nersornaammik tunniussisoqanngimmat, kisiannili assorujussuaq tulluusimaarutigaara kalaallit nersornaasiinissamut siunnersuutigineqarsimasut taakkulu suliarisimasaat pillugit. Neriuutigaara ukiumi tullermi Nunat Avannarliit Siunnersuisooqatigiivisa kulturikkut nersorsaasiuttagaannut aamma taama pikkoritsigisunik nersornaasigassanik sassartitaqarsinnaassasugut.” Aleqa Hammond oqarpoq.

Aleqa Hammond-ip Nunat Avannarliit Siunnersuisooqatigiivisa katersuunnerannut atatillugu sisamanngornermi nunat marluk ataatsimiinneranni Norge-mi nunanut allanut ministerinngortoq Børge Brende naapippaa.


Aleqa Hammond aamma Norgep Nunanut Allanut Ministeria, Børge Brende.

Norgemi naalakkersuisunngortut oktoberip 16-ani atuutilerput, Naalakkersuisullu Siulittaasuannik ataatsimeeqateqarneq Børge Brende-mut nunap allap sinniisutitaanik ataatsimeeqateqarnerisa siullliit ilagaat.

Naalakkersuisunut Siulittaasup Norge-milu nunanut allanut ministerip ataatsimiinneranni oqaluuserineqarpoq Norge-p Kalaallillu Nunaata akornanni pissutsit ukiuni aggersuni qanoq patajaallisarneqarsinnaanersut. Uuliasiorneq immikkut isigalugu suli periarfissaqarpoq pitsaasumik suleqatereereernerup annertusinissaanut tunngavissiisussamik.

Naalakkersuisunut Siulittaasup Norge-llu nunanut allanut ministeriata aamma Nunat Avannarliit Siunnersuisooqatigiivini suleqatigiinneq oqaluuseraat, matumani Naalakkersuisunut Siulittaasup nunanut allanut ministeri kaammattorpaa Kalaallit Nunaata, Savalimmiut Ålandillu Nunat Avannarliit Siunnersuisooqatigiivinut atasumik statsministerit aasaanerani ukiumoortumik aalajangersimasumik ataatsimiittarneranni ilaatinneqartalernissaat pillugu danskit statsministeriata siunnersuutaa Norge-p tapersersussagaa.


Aleqa Hammond, Savalimmiormiut Lagmandiat Kaj Leo Johannesen aamma Ålandip Lantrådia Camilla Gunnel.

Naalakkersuinikkut apeqqutit pingaarutillit, matumani aamma uranimut aatsitassanullu radioaktivitetinik qinngornilinnik attuilluinnanngeqqusinerup atorunnaarsinneqarnera aammalu aatsitassarsiornerup iluani ineriartorneq aammattaaq oqaluuserineqarput.