Nuannersumik qungujugit!

Aaveq

Kigutigissaasut arfininngornermi 16. novembari Nuuk Centerimi aaqqissuussiniarput, tassanilu Nuummi innuttaasut qungutsarissuunertik takutissallugu periarfissaqassapput, 2014-imilu Nuna tamakkerlugu ullormut Kigutigissarfimmut plakatissamut assilisissinnaassallutik.

-”Kigutitit paarilluarukkit inuunerit naallugu kigutigissuusinnaanerit qungutsarissuusinnaanerillu Kigutigissaasut innuttaasunut pingaarnertut oqariartuutigaat. Nuuk Centerimi ulloq atorniarparput kigutigissuuneq soqutigineqalersinniarlugu, neriuutigaarpullu inuit qassinilluunniit ukioqarunik Nuna tamakkerlugu ulloq Kigutigissarfik pillugu ukioq tullermi plakatissamut assilisikkiartorumaartut", kigutit nakorsaannut pisortaq Olina Hansen oqarpoq.

Kigutigissaanermi sulisut pisiniarfissuarmiissapput, pisiniarfissuarmilu ilaatigut kigutigissartarneq, kigutigissaatit kigutigissarnermilu qaqorsaatit pillugit paasissutissanik tunioraassapput, kigutigissuunissarlu pillugu pitsaasunik siunnersuissallutik.

-”Pitsaaliuineq imminut akilersinnaavoq. Kalaallit Nunaanni kigulluut Caries akiorniarlugu suliniutissatut siunniussami (Cariesstrategi), qaammarsaaneq, kigutigissuunissamut paasissutissanik nalunaarsuineq, angajoqqaanut meeqqanullu pitsaaliuinermik suliniutit aallartiaarnissaat anguniarneqarput. Suliniullu 2008-mi atorneqalermat meeqqat kigutaasa malunnartumik pitsanngoriarnerat takusinnaallugulu uuttorsinnaasimavarput, pingaartumik meeqqat mikinerit akornanni," kigutit nakorsaannut pisortaq Olina Hansen oqarpoq.

Ulloq 16. november Kigutigissaasut - pisarnertik malillugu - kigutigissarnermut siunnersuutit sisamaasut ilisimaneqarnerulernissaannik siammarteriniarput, qulequtarlu "Kigutigik! Inuuneq tamaat Kigutit!" qulequtaralugu inunnut inuunertik naallugu kigutigittuaannarusuttunut kikkunnut tamanut saaffiginnipput:

  • Ullaakkut unnukkullu kigutitit salilluartakkit
  • Meeqqavit 10-nik ukioqalernissaa tikillugu kigutigissarnerani ikiortaruk
  • Kigutigissarnermi qaqorsaat annertuumik fluoritalik atortaruk, pitsaanerpaajuvoq 1450 ppm
  • Mamakujuit, saftit sodavandillu ulluinnarni unitsikkit

Paasissutissat sukumiinerusut pillugit attavigiuk:
Siunnersorti Ane Jeppesen oqarasuaat: +299 34 40 16 imal. e-mail: anej@peqqik.gl