Savalimmiut Kalaallillu Nunaatalu suleqatigiinnertik pitsanngorsarpaat

Savalimmiut Kalaallillu Nunaat pisortat ingerlatsinerannik nutarsaanermi pitsanngor¬saanermilu suleqatigiinnertik pitsanngorsarpaat

Unammilligassaq tassaavoq suliassaqarfimmi amerlanernik sullissisoqarsinnaanissaa taamaalillunilu aaqqiissutissanik pitsaanernik akikinnernillu pisariaqartitsilerluni. Suleqatigiinnermi ilisimasanik misilittakkanillu paarlaasseqatigiinnissaq taamaammat pingaaruteqarpoq.

Nunat taakku marluk piorsarsimassutsikkut, nunarsuup immikkoortuani innuttaasullu najugaqariaatsimikkut arlalinnik assigiissuteqarput. Paaseqatigiilluarsinnaanermik tamanna tunngaviliivoq. Nukittussuseq taanna aamma suleqatigiinnermi aallaaviussaaq.

Digitaliseriinermut Aqutsisoqarfik Aningaasaqarnermullu Naalakkersuisoqarfik ulluni 12.-15. november 2013-imi Savalimmiunut tikeraarpoq. Peqqinnissaqarfimmi qarasaasianik sullissineq aningaasaqarnermut missingersuusiortarnernullu annerusumik aqutsiffiusoq ilaatigut eqqartorneqarput. Tunngaviusumik paasissutissat aamma sammineqarput, ilaatigut inuit pillugit paasissutissanut inatsit nunallu killeqarfii akimorlugit paasissutissanik paarlaasseqatigiissinnaaneq eqqartorneqarluni, tamannalumi Kalaallit Nunaata nunarsuarmioqataaleraluttuinnarnerani pisariaqarsiartuinnarmat.

Suliniutit taakku Naalakkersuisut IKT-mik periusissiaanni 2013-17-imut ilaapput, aaqqiissutissallu atortuulersinnissaannut isumasassarsiortoqarpoq, tassani Kalaallit Nunaanni Savalimmiunilu pisortat suliassaqarfiini atugassarititat piusut aallaaviussallutik.

Tikeraarnermut atatillugu marloriaammik akileraannginnissaq pillugu isumaqatigiissummut ilassutissatut nunat taakku marluk isumaqatiginninniarnermik aallartitsipput.

Suleqatigiinnissamut isumaqatigiinnermi Jørgen Niklassenip aamma Vittus Qujaukitsup 2013-imi naapinneranni suleqatigiinnissamut suliniutit tigussaasut pilersinneqarput, illuatungeriillu taakku isumaqatigiissutaat 2014-imi sakkortusarlugillu ersarissarneqassapput.