EU-mi puisit amiinik eqqusseqqusiunnaarneq pillugu WTO-p aalajangiinera

World Trade Organizationip (WTO) tunisassianik puisineersunik EU-mi nunanut eqqusseqqusiunnaarneq pillugu EU-mi peqqussummut, tassunga ilanngullugu pineqartut Inunnut (Inuit) 2009-mit atuutsinneqannginneranut piviusunngortitsinerlu pillugu peqqussummut 2010-meersumut tunngatillugu inaarutaasumik aalajangiinini 25. november 2013-imi saqqummiuppaa.

Nunap inoqqaavisa puisinniartarnerannut tunngatillugu EU-mit ilaatitsinnginneq imaanilu pisuussutinik aqutsineq WTO-mi - Technical Barrier on Trade-mut (TBT) Gatt94-imullu akerliusutut, niuerniarnermi teknikikkut akornusersuutaasutut isigineqarpoq, tamatumani nunat assigiinngitsut immikkoortinneqartutut naliliiffigineqarlutik. WTO-p aalajangiinerani allassimavoq Nunarput salliutinneqartoq Canada ilaatigullu Norge tamarmik aningaasarsiutigalugu puisinniarfiusut pilliutigalugit.

WTO-mit isumaqartoqarpoq nunatsinni puisinniartarneq aningaasarsiornermit sunnerneqarsimasoq, tassami Great Greenland niuerfittut ingerlanneqarmat. Naak Inuit puisinniartarnerat aningaasannanniutigalugu piniarnermit allaanerujussuartut WTO-mit nassuerutigineqaraluartoq, ataatsimut aaqqissuussaanera, kiisalu Nunatta nunanut EU-miittunut puisit amiinik eqqussuinissamut akuersissuteqarsinnaasutut oqartussaasutut qinnuteqarsimanera akuerisaasimaneralu Canadamut tunngatillugu allaanerusumik immikkut inissisimanera WTO-mit pingaartinneqarpoq. Canada oqartussaasutut akuersissuteqartalernissamik suli qinnuteqarsimanngilaq. Nunarput oqartussatut akuersissuteqartartuusutut 25. april 2013-imi EU-mit akuerineqarpoq.

Namminersorlutik Oqartussanit isumaqartoqarpoq WTO-mit tunngaveqarpiarani pissutissaqartitsisoqartoq suliami ajornartorsiutaanerpaasut allamut saatinneqarlutik. Tassa tunisassianik piujuartitsinissamik tunngaveqarneq tunuliaqutaralugu pissarsiaasunik eqqussuineq assersuutigalugu aningaasarsiutigalugu aalisakkanik avammut tunisassiornermit allaanerusumik suliarineqartariaqanngitsoq.

Tunuliaqutaasoq pillugu paasissutissat.