Saliisoqartussanngorpoq

Nunami avatangiisitsinni saliisoqarnissaa kikkut tamarmik akisussaaffigaat Kim Kielsen oqarpoq.

Ataatsimiinnermi naammassineqaqqammersumi Avatangiisinut Pinngortitamullu Naalakkersuisoq Kim Kielsen aamma KANUKOKA-p siulittaasua Martha Abelsen isumaqatigiipput, avatangiisinut suliassaqarfimmi – pingaartumillu eqqagassalerinermi – maana pitsannguisoqassasoq.

Kim Kielsen sapaatit akunneranni matumani Kalaallit Nunaata kujataanut aallassaaq, ilaatigut eqqagassalerinermi unammilligassat pillugit Kommune Kujalleq ataatsimeeqatigissallugu. Oqariartuut ersarilluinnarpoq, tassalu eqqagassalerinermi pisimasut naammanngillat, taamaattumillu maanna isumagineqartariaqalerput.

Eqqagassalerinermi ajornartorsiutit annertupput, taakkulu aaqqinneqassapput. Kim Kielsen-ip aallaqqaammut saliisoqarnissaa aallunniarpaa.

- Inissiat, biilit angallatillu qimaannakkat amerlavallaaqaat. Tamatta akisussaasariaqarpugut, aammalu saliisinnaaniassagatta ersarissunik immitsinnut anguniagassittariaqarpugut. Tamanna Namminersorlutik Oqartussanut namminernut, kommuninut, suliffeqarfinnut namminersortunut innuttaasunullu atuuppoq. Annerusumik akisussaaffeqarluta iliuuseqartariaqarpugut, aammalu inuit ataasiakkaat piaaralutik saliisimanngippata pineqaatissiissutinik atuinissarput ersigisariaqanngilarput.

Ataatsimiinnerup naanerani Kim Kielsen aamma Martha Abelsen siunissami qaninnerusumik suleqatigiissallutik isumaqatigiipput. Suleqatigiinneq taanna ilaatigut eqqagassalerinermi pitsannguinernik inerneqassaaq.