NI Nuuk

Tigussaasunik pilersaaruteqanngilaq NI-Nuuk nuunniarlugu – aammalu NI-1 atorunnaarsinneqassanngilaq

NI-Nuuk-miit ilinniagaqartut NI-1-imut atatillugu oqaaseqaataat qisuariarfigalugit Naalakkersuisoq Nick Nielsen imatut oqaaseqaateqarpoq:

”Ajunngilluinnarpoq ilinniarfinni assigiinngitsuni ilinniartugut inuiaqatigiinni oqallinnermut aammalu ilinniartitaanernut tunngasumik oqallinnernut akuleruttarmata, uangalu soorunami ilinniartut oqallinnermut peqataanerat tusarnaarpara. Kisianni ilumuunngilaq oqaatigineqarmat pilersaaruteqartoqartoq Nuummi Niuernermut ilinniarfimmi ilinniartitaaneq NI-1 atorunnaarsinniarneqartoq. NI-1 maannamusut imaqarluni ingerlaannassaaq, aammalu piffissami aggersumi inuussutissarsiortut pisariaqartitsinerat suli aammalu naleqqussarneqarsinnaalluarluni.

Uanga isumaqarpunga NI-1 gymnasiami atuareernermi inuussutissarsiortut pisariaqartitaannut sammivilimmik ilinniagaasariaqartoq. Ilinniagaqartut tigussaasunik piginnaasassaminnik katersisinnaaqqullugit, niuernerup iluani ilinniaqqinnissaminnut atorsinnaasaminnik, imaluunnit inuussutissarsiorfinnut namminersortut ingerlataannut periarfissarsiorsinnaaqqullugit. Taamaattumik kukkunerulluinnarpoq isumaqartoqalersimappat NI-1-i atorunnaarsinniarneqartoq.”

Ilutigisaanik Nick Nielsen-ip malugeqquaa ilinniagaqartut faginik assigiinngitsunik tigussaasunik amigaateqarunik, assersuutigalugu Matematik B imaluunniit tuluit oqaasii A, taava fagit taakkua fagitut ataasiakkaatut GU-mi atuarneqarsinnaammata.

Naggasiullugulu Nick Nielsen-ip erseqqissaatigivaa aalajangiisoqarsimanngimmat NI-Nuuk Qaqortumi Niuernermut ilinniarfimmut ilaliullugu kattunneqassanersoq pillugu.

”Siusinnerusukkut Borgmester Jørgen Wæver Johansen-ip Niuernermi Ilinniarfitta marluusut Qaqortumi Niuernermut Ilinniarfimmi katersorneqarsinnaanerannut isumaliutai tikilluaqqusimavakka. Isumaqarpungalu isumaliutit soqutiginartut oqallisissaqqillutillu, fagitigut angusarineqarsinnaasut qaffassarneqarnissaat siunnersuutaasimappat, nunatsinnilu tamarmi ineriartorneq pineqarpat, taamaattumillu Borgmester Jørgen Wæver Johansen-ip isumaliutai taamatut angusaqarusunnertut isigalugit.

Ilutigisaanillu maluginiarpara oqallinneq inuit tamat oqalliffianni ingerlaqqimmat, aammalu toqqaannartumik niuernermut ilinniarfiit siulersuisuisa uangalu akornatsinni aamma ingerlalluni. Oqallinneq ingerlasoq nuannaarutigaara, aammalu isummat saqqummiussorneqartut amerlasuut ilinniartitaanermi anguniakkatsinnut atatillugu isumaliutersuutitsinnnut ilaatillugit, ilinniartitaanermi anguniakkat Naalakkersuisut sinnerlugit 2014-imi upernaakkut ineriartorteqqinneqartumik saqqummiunneqarnissaannut atatillugit. Kisianni ilinniarfiit ataatsimut katinneqarnissaannut tunngasunik aalajangertoqarnikuunngilaq, aammalu tamatumunnga aningaasaliissutinik immikkoortitsisoqarnikuunani, soorunalumi ilinniartut isumaat tusarnaarpakka, soorluttaaq sumiiffinni ataasiakkaani politikkerit isumaat naalaarikka.”

Inussiarnersumik inuulluaqqusilluta
Nick Nielsen