Sooq meeqqat eqqugaappat

- oqaloqatigiinnissaq sooq naaggaarneqarpa?

Nunatta Isiginnaartitsisarfiani pisortaq Svenn B. Syrin ulluni kingullerni tusagassiutini nalunaaruteqartarpoq isiginnaartitsisarfimmut aningaasanut inatsimmi aalajangersimasumik aningaasaliissutit tre millioner koruuninik ikilinissaat ”ajorluinnartoq”. Oqaaseqaat isiginnaartitsisarfiup ukiuni aggersuni meeqqanut angalalluni isiginnaartitsisarnissamik taamaatitsinermik malitseqartinneqartoq.

Nick Nielsen, Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisoq isumaqarpoq Nunatta Isiginnaartitsisarfia ingasattajaarluni qisuariartoq, suliamilu uani meeqqat sallunaveeqqutiginerat tupigusuutigingaarlugu. Nick Nielsen isumaqarpoq tassunga taarsiullugu KNR-imut ukiuni aggersuni aningaasaliissutaanerusussatut pisariaqartinneqartut Nunatta Isiginnaartitsisarfianut aningaasaliissutinit aalajangersimasunit tiguneqartussangulerunarmata oqaloqatigiinniarluni aggersaaneq isiginnaartitsisarfiup akuerisariaqarsimagaluaraa.

Nick Nielsen ”Allakkami ataasinngorneq ulloq 11. november nassiunneqartumi isiginnaartitsisarfik Naalakkersuisut aalajangernerannik nalunaarfigaarput sapaatillu akun-nerata tulliani ataatsimiinnissamut qaaqqullugu, tassani isiginnaartitsisarfiup suliniutaanut aningaasalersuinissamut periarfissat allat oqallisigineqarsinnaallutik. Isiginnaartitsisarfiup tamanna qisuariarfiginngilaa – tassungalu taarsiullugu sinerissami meeqqanut isiginnaartitsinissaq taamaatillugu kinguneqartitsilluni sakkortuumik nalunaaruteqarluni. Pineqarpiartorli tassaavoq Tipsimit Lottomillu aningaasat atorlugit tapiissuteqarnikkut isiginnaartitsisarfiup ingerlatassaasa ilarpassuisa ingerlanneqarsinnaanerat, taamaammallu oqaloqatigeereertinnata aalajangiisoqarnikuunngitsoq – uanili oqaloqatigiinnissamik Nunatta Isiginnaartitsisarfia aammaarlunga kaammattoqqissavara.”

Nick Nielsen nangippoq: ”Aamma sinerissami ingerlatassat ikilisinnissaannik isiginnaartitsisarfiup nalunaaruteqarnera ajorluinnarpoq. Isiginnaartitsisarfiup siunertaasa ilagaat, uangalu taperserluinnagara, tassaavoq sinerissami suliffigivinnagu sumiiffinni isiginnaartitsisartut ineriartornerisa tapersernissaa, taamaammat sipaarutissanik nassaartoqassappat sinerissami ingerlatat sipaaruteqarfigineqartariaqanngillat – pingaartumik meeqqanut tunngasut. Nunani allani isiginnaartitsisannginnissaq aamma toqqarneqarluarsinnaavoq”.


Inussiarnersumik inuulluaqqusilluta

Nick Nielsen