Kinamiut atisaannut nutaalianut Nunarput tunulequtsiisoq

Atisanik takutitsineq Kinami - Beijingimi nunatsinnit inuussutissarsiutinik saqqummiussinerujussuaq
Beijingimi danskit ambassadianni nunatsinnit tunisassianik pilerisaarinermi Jens-Erik Kirkegaard novembarip tallimaanni qaaqqusisuuvoq. Pisussamut tusagassiortut kineserit 40-t missaat peqataaniarsimapput. Taakku saniatigut Kinami inuussutissarsiorfimmit sinniisuutitat peqataapput.
Pilerisaarinermi alutornarnerpaat ilaat tassaavoq Great Greenlandip amernik qaatiguuliai tunisassiaalu allat nutaat saqqummiunneqarnerat. Atisaliat nutaat kineserit modeliinit takutinneqartut kineserini inuussutissarsiortunit tusagassiortunillu takkussimasunit assorsuaq alutorsaatigineqarput.
Mutinik internetikkut saqqummiussisartoq tusaamasaq, Xu Fengli, bloggimini millionit sinnerlugit malitseqartartoq Visit Greenland, Air Greenland aamma World of Greenland Arctic Circlemik suleqateqarluni 2013-imi ukiakkut Nunatsinnut tikeraarsimavoq. Peqatigaa assiliisartoq Peter Chang. Marluullutik assinik saqqummersitaliorsimapput qaammatit tulliini Fenglip bloggiani saqqummerseqattaarneqartussanik. Taakku saniatigut Kinami atisanik nutaalianik atuagassiani annerpaani marlunni allaaserisanik marlunnik saqqummiisoqassaaq - pineqarluni Kalaallit Nunaat ukiuunerani angalaarfissatut. Kalaallit Nunaat pillugu atugassiat aamma Kinami pisiniarfinni arlalinni pisiarineqarsinnaanngussapput.
Siorna Beijingimi ambassademi Kalaallit Nunaat pillugu saqqummiussinermit suleqatigiinneq toqqaannartumik tunngaveqartuuvoq. Kinami atuisunit soqutiginnikkiartorneq malunnarsereersimavoq. Visit Greenlandimit apersuinerup takutippaa 2013-imi takornariat kineserit 400-t missaat Ilulissaneereersimasut.
Pilerisaarineq ukiumi takkuttussami pilersaarusiornermik tuniniaanermillu sulianik piviusunik malitseqartinneqassaaq.
- Takkussimasunit soqutiginninnerujussuaq ajasoorutigaara, Jens-Erik Kirkegaard oqarpoq. Nunatta misigisassatigut periarfissarpassui assissaqanngitsut kineserinut pilerinartuunerat qularutissaanngilaq. Pinngortitaq minguitsoq, nerisassatigullu misigisassat pissanganartut tassaapput Kalaallit Nunaannik feriarfissatut toqqaaniartillugit takornariat kineserit amerlanerit akuersisinniarnerinut tuniniaanermut tunngavissatsialaapput.