Sakkortunerpaamik akerlerineqarput

Akinut isumaqatigiissuteqartarnerit suleqatigiiffeqartarnerillu Naalakkersuisunit sakkortunerpaamik akerlerineqarput

Ineqarnermut Naalakkersuisoq Siverth K. Heilmann oqarpoq:
”Kalaallit Nunaanni Sulisitsisut Peqatigiiffiat inatsisinik unioqqutitsilluni akinut isumaqatigiissuteqarnissamut suleqatigiiffinnillu pilersitsinissamut atugassiisarnersut suleqataasarnersulluunniit misissuiffigineqartoq maluginiarpara. Akinik aalajangersaasarnerup niuerfimmi paasiuminartumi (ersarissumi) aammalu suliassaqarfiup avataanit sullissisut akornanni unammillerfiusumik ingerlanneqarnissaa pingaaruteqarpoq. Namminersorlutik Oqartussat kommunillu sanaartugassanik ukiumut millioner koruuninik amerlasuunik nalilinnik neqerooruteqartitsisarput. Taamaattumik niuerfiup angusaqarfiusinnaasumik, aammalu namminersortut akornanni suliassap kimit isumagineqarnissaanik isumaqatigiissuteqartarnerit akinullu isumaqatigiissutinik atuiffiunngitsumik, minnerunngitsumillu neqerooruteqartitsinerit malillugit akinik aalajangersaasoqarnissaanut tatiginniffiusumik ingerlanneqarnissaa pingaaruteqartorujussuuvoq. Politiit aamma Unammilleqatigiinnermut Nakkutilliisut suliamik misissuinerata inernerisassaa qilanaaraara.
Qanoq iliorluta Nunatsinni sanaartornerni inatsisinik unioqqutitsilluni akinut isumaqatigiissuteqartarneq pinngitsoorsinnaanerlutigu kommunit, Namminersorlutik Oqartussat soqutigisaqaqatigiiffillu akornanni oqaloqatigiittoqarnissaanik kaammattuerusuppunga.


Inussiarnersumik inuulluaqqusillunga


Siverth K. Heilmann