Saattuarniarnermi pisassiissutip qaffanneqarnera

Qeqertarsuup Tunuani Uummannamilu sinerissap qanittuani saattuarniarnermi pisassiissutip qaffanneqarnera.

Naalakkersuisut ulloq 7. november 2013-imi ataatsimiinnerminni aalajangerpaat aqutsiveqarfimmi Qeqertarsuup Tunuani Uummannamilu sinerissap qanittuani saattuarniarnermi pisassiissutit qaffanniarlugit. Qinnuteqaammik tigusaqareernerup kingorna pisassiissutit katillugit tonsinik 100-nik qaffanneqarput.

Naliliiffigineqarpoq taamatut pisassiissutit annertussuseqartillugit 2013-ip sinnerani sumiiffimmi pineqartumi aalisarnerup ingerlaannarnissaanut periarfissaqassasoq. Erseqqissaatigineqassaaq pisassiissutip qaffanneqarnera 2013-14-mut biologit inassutaanni killigititat qaangerneqanngimmata. Sumiiffimmi pineqartumi inassutaavoq annerpaamik tonsit 600-t angullugit aalisartoqassasoq, pisassiissutillu qaffanneratigut pisassat akuerineqartut tamarmiusut tonsit 600-nngorput.