KNI A/S

KNI A/S-mut siulersuisut ingerlatseqatigiiffimmi aqutsinikkut pisumi ilungersunartumut aaqqiissasut Naalakkersuisut tatigilluinnarpaat

Naalakkersuisut Siulittaasuat Aleqa Hammond, aktiaatileqatigiiffinnut tamakkiisumik ilaannaasumilluuniit piginnittuunermut tunngatillugu piginnittunut sinniisaasoq KNI A/S-imut siulersuisut siulittaasuannit ingerlatseqatigiiffimmi pisoq pillugu ilisimatinneqarpoq, tassalu siulersuisut nutaamik pisortaanermik taamatullu aningaasaqarnermut pisortamut naatsorsuuserinermullu pisortamut nutaanik siunissami qanittumi pissarsiortussanngortut.

Naalakkersuisut Siulittaasuat Aleqa Hammond:
- Naalakkersuisut sinnerlugit annertuumik ajuusaarutigaara nunatsinni suliffeqarfiit pingaarnersaasa ilaat aqutsinikkut ilungersunartumik inissimmat. Qularutiginngilluinnarparali ingerlatseqatigiiffiup ingerlanneqarneranut pingaarnertut akisussaasuusussatut aggustimi siulersuisunut qinigaasut suliassamik naammassinnissinnaasut.

- Suleriaatsinik aaqqissuussaanermillu pitsanngorsaanissaq, aammalu nunatsinni suliffeqarfiit annersaasa pingaarnersaasalu ilaanni patajaallisaanissaq siunertarerpiarlugu taakku toqqarneqarput. Taamaattumik siulersuisutut pikkorilluinnartutut toqqagaasimasut taakku pisoq iliuuseqarfigissagaat Naalakkersuisut tatigilluinnarpaat.

Erseqqissarneqassaaq Namminersorlutik Oqartussat aktiaateqartuusutut aammalu ingerlatseqatigiiffiup akornanni attaveqaqatigiinnerup pisortatigoortortaa, aktiaatileqatigiiffiit pillugit inatsit naapertorlugu ataatsimeersuarnermi pisarmat. Taamaattumik Naalakkersuisut Siulittaasuat Aleqa Hammond, ingerlatseqatigiiffiup KNI A/S-ip ulluinnarni aqunneqarnera ingerlanneqarneralu pillugu oqaaseqartussaanngilaq, pingaartumik ingerlatseqatigiiffimmut tunngatillugu inunnut ataasiakkaanut sulianut tunngasut eqqarsaatigalugit.