Kanngussammik ujaasineq pillugu suleqatigiinneq

Jens Erik Kirkegaard Nanchangimi

Kalaallit Nunaanni kanngussammik ujaasineq pillugu suleqatigiinneq nukittorsarneqartoq

Naalakkersuisup Jens-Erik Kirkegaardip Kinami kanngussammik aatsitassarsiorfinni ingerlatseqatigiiffiit annersaat Jiangxi Copper Company Limited naapeqatigaa

Naalakkersuisup Jens-Erik Kirkegaardip Kinami tuniniaanermik pilerisaarinini Kinap kujataani Jiangxi-provinsimi Nanchang tikeraarlugu aallartissimavaa. Tikeraarnermi Kalaallit Nunaanni Sulisitsisut Peqatigiiffiannit, Inuussutissarsiornermut, Aatsitassaqarnermut Suliffeqarnermullu Naalakkersuisoqarfimmit kiisalu Nunanut allanut Pisortaqarfimmit sinniisuutitat peqataapput.

Jens-Eriup Dexin Copper Mine takornariarpaa; taanna Kinami kanngussammik aatsitassarsiorfiit annersaraat, tassungalu atalluni Guixi aatsitsisarfik, nunarsuarmi kanngussammik aatsitsisarfinni annerpaaq.

Tikeraarnermut atatillugu ingerlatseqatigiiffiup China Nordic Mining Company Ltd.-imit Tunumi maannakkut kineserit kanngussamik ujaasinerat pillugu ingerlatseqatigiiffimmi pisortaanersat ataatsimeeqatigineqarput.

Jiangximi kanngussammik aatsitassarsiornermi suliat sunniuteqarluartumik teknologiimillu pitsaalluinnartumik inissisimassuseq nammineq takullugu paasisaqarfigaara, Jens-Erik Kirkegaard oqarpoq, nangillunilu:

- ujaasinissamik sulianik annertuunik kivitsinissamut, minnerunngitsumillu kingunerisaanik aatsitassarsiuinnissamut aningaasaliinissamik pisariaqartutut teknologiikkut aningaasaqarnikkullu nukittussuseqartunut ingerlatseqatigiiffinnut kajungernarnissarput pingaartuuvoq.

Ukiuni takkuttussani Jameson Landip avannaani annertuumik qillerisarnissat ingerlanneqassasut pilersaarutaapput. Iluarinartutut ujaasinermik inernerisat kanngussammik aatsitassarsiorfivissamik nassataqartitsisinnaanersut pillugit paasisaqarnissaq anguniagaavoq.

Ujaasinermik ingerlatassat Aatsitassanut ikummatissanullu Aqutsisoqarfimmut, soorlulusooq Avatangiisinut Aqutsisoqarfimmut, suliat nunani tamalaani pitsaasunik periuserisartakkamut naapertuuttumik ingerlanneqarnerinik isumannaarisussanut akuerisassanngorlugit nassiunneqartuartassapput.

Maannakkut angalaneq Kinami aatsitassanik saqqummersitsivissuarmut China Miningimut, nunatsinnit suliffeqarfiit arlallit angalaartunut akuleruffissaannut ingerlaqqissaaq.