Inuunerittap Aningaasaateqarfia suliniutinut 29-nut tapersiivoq

Peqqissutsimut Attaveqarnermullu Naalakkersuisoq Steen Lynge aningaasanik najukkani pitsaaliuinermi peqqinnerulersitsiniarnermilu suliniutinut atorneqartussanik Inuunerittap Aningaasaateqarfianit agguaassivoq.

Inuunerittap Aningaasaateqarfianit aningaasanik qinnuteqarniarlutik soqutiginnittut amerlasimaqaat. Katillugit suliniutit 29-t ukiaq manna aningaasanik tapiiffigineqarput, katillugillu 323.039 kr.-it tunniunneqarput.

Ilaatigut imigassamut hashimullu tunngatillugit unnuit oqalliffiullutillu paasisitsiniaaffiusussanut aningaasanik tunniussisoqarpoq. Aamma meeqqat angajoqqaamik angerlarsimaffimmi imigassamik hashimillu atornerluinerisigut misigisaat meeqqat namminneerlutik oqaluttuarnerat malillugu allatatigut assilissatigullu erseqqissaalluni suliniummut tapiissuteqartoqarpoq.

-”Imigassamik hashimillu atornerluineq Nunatsinni innuttaasut peqqissuunissaannut ajornartorsiutaanerpaavoq. Atornerluisuuneq akiorniassagutsigu pisortat inuillu namminneq suliniuteqarnerisigut annertuumik suliniuteqartoqarnissaa pisariaqarpoq. Taamaammat nuannaarutigilluinnarpara taamak amerlatigisut imigassamik hashimillu atornerluisuunerup pinaveersaartinniarnissaanut suliniutinut aningaasanik qinnuteqarsimammata", taama oqarpoq Peqqissutsimut Attaveqarnermullu Naalakkersuisoq Steen Lynge.

Naliliiniarnermi suliniutit imigassamik hashimillu atornerluisuunerup pinaveersaartinnissaanut tunngasut pingaartinneqarsimaqaat, tamanna 2013-imi Inuuneritta II-mi inuit peqqissuunissaannut pilersaarummi immikkut suliniuteqarfiummat.

Qinnuteqaatit nalilersorneranni suliniutit sammisassallu meeqqanut, inuusuttunut ilaqutariinnullu sammititaanersut aamma apeqqutaasimavoq. Kiisalu qinnuteqaatit ilisimasat akimorlugit paasisaqarsinnaaneq tunngavigalugu nalilerneqarput, soorlu peqqissutsimut, isumaginninnermut, pingaartumillu kulturimut tunngasut ilanngullugit suliniutaanersut.

Innuttaasut peqqissuunissaat pillugu suliniutip Inuuneritta-p atuutilersinneqarnerani Inuunerittap Aningaasaateqarfia pilersinneqarpoq. Suliniutinut peqqinnerulersitsiniarnermut pitsaaliuinermullu tunngasunut ukiumut marloriarluni aningaasanik qinnuteqartoqarsinnaavoq.


Tullianik Inuunerittap Aningaasaateqarfianut qinnuteqarnissamut killigititaavoq 1. april 2014, tassanilu pujortartarnermut tunngatillugu suliniutit pingaartinneqarumaarput. Inuunerittap Aningaasaateqarfia pillugu paasissutissat annertunerusut Peqqinnissaqarfiup isaaviani www.peqqik.gl-imi atuarneqarsinnaapput.