International Cold Water Prawn Forum, London 2013

Aalisarnermut, Piniarnermut Nunalerinermullu Naalakkersuisoq Karl Lyberth kattuffiup ”International Cold Water Prawn Forum"-ip ukiumoortumik ataatsimiinnerani peqataaqqammerpoq. Ataatsimiinneq Londonimi 21. november 2013 ingerlanneqarpoq.

”International Cold Water Prawn Forum” kattuffiuvoq aningaasarsiornissamik siunertaqanngitsoq aalisartunit, tunisassiortunit, aalisarnikkut kattuffinnit, tuniniaasartutut ingerlatseqatigiiffinnit biologinillu peqataaffigineqartoq.

”International Cold Water Prawn Forum”-ip siunertaraa Atlantikup avannaani issittup raajaanik aalisarnermik soqutigisaqartunut nunallu tamalaat akornanni paasissutissanik paarlaaqqatigiittarnissaq attavissarsortarnerlu.

Ataatsimiinnermut atatillugu Naalakkersuisoq Karl Lyberth oqalugiartussatut pingaarnertut aggersarneqarsimavoq. Karl Lyberthip oqalugiarnermini erseqqissaatigaa raajarniarneq kalaallit aningaasaqarniarnerannut pingaaruteqartorujussuusoq, nunanut allanut nioqquteqartarnermi isertitsissutaasatut amerlanersaat tassanngaaneermata. Kalaallit raajarniarnerannik ingerlatsisut siunissami unammilligassaataaq erseqqissaatigineqarput. Ilaatigut ukiuni kingullerni marlussunni biologit pisassiissutissatut inassutigisartagaasa ajoraluartumik ikiliorternerisa kingunerisaanik. Akerlianilli kitaanni raajarniarnermi pisat 2013-ip aallartinnerani MSC-mik nalunaaqqutsersorneqartalerput, tamannalu pitsaasup tungaanut alloriarneruvoq erseqissarneqarlunilu taamatut aalisarneq akisussaassuseqartumik tamanillu malinnaaffigineqarsinnaasumik ingerlanneqartoq.