Anda immikkut ittumik pineqanngilaq

Matumuuna Andreas Uldum Demokraatineersup uanga peqqussutimma kinguneranik Peqqissutsimut Naalakkersuisoqarfimmit nakorsartinnissamik neqeroorfigitissimalluni pisuutitsiniarnera akerlilerusuppara.

Naalakkersuisutut ikkunneqarnerma kinguninngua paasivara Andreas Uldum Facebookikkut peqqinnissaqarfik pillugu annertuumik isornartorsiuisimasoq.

Tamanna pillugu Peqqissutsimik Naalakkersuisoqarfimmi pisortaq ilisimatippara, taannalu qinnuigalugu Andreas Uldum attavigissagaa maalaaruteqarnissaanik kajumissaaqqullugu. Taamaasilluni peqqinissaqarfiup ilisimalerniassammagu kiisalu iliuuseqarfigisinnaaniassammagu maalaarut taamak annertutigisoq soorlu Facebook-imini allaaserisimasaa.

Andreas Uldum Demokraatineersoq saaffiginissut itigartippaa. Tamatuma kingorna naalakkersuisoqarfimmit tamanna pillugu iliuuseqartoqaqqinngilaq.

Uanga isumaqarpunga innuttaasut tamarmik aamma politikkikkut suliallit pisussaaffeqartut maalaaruteqarfissat pisortatigoortut atortarnissaannut, nalaassimagunikku napparsimaveqarfimmit nakorsartinneq kiffartuussinerlu pillugit maalaaruteqarnissamik peqquteqartoqartoq. Taamaasilluni napparsimaveqarfik periarfissaqalissammat maalaarummut iliuuseqarnissaminut ilinniarfiginissaanullu.

Tupaallappunga Andreas Uldum Demokraatineersoq ullumi tusagassiutini saqqummertutut suliaq saqqummiussimammagu imatullu isikkoqartilerlugu immikkut ittumik nakorsartinnissamik neqeroorfigitissimasutut naak piviusoq allaagaluartoq. Kisimi kajumissaarneqarpoq maalaarummik nassiussisinnaasoq.

Uanga isumaqarpunga ullumi Andreas Uldummip saqqummiussai eqqunngitsuusut, taakkulu sakkortunerpaamik akerlilerusuppakka.

Inussiarnersumik inuulluaqqusillunga

Steen Lynge