Kujataani innuttaasunik ataatsimiisitsinissat

JEK foto 2

Kujataamiut amerlanerpaat sunniuteqarlutik peqataaqquneqarput

Tanbreezip Killavaat Alannguanni aatsitassanik qaqutigoortunik Eudialytinik piianissamut akuersissummik qinnuteqarneranut atatillugu suliniummut nalunaarusiat marluk tamanut ammasumik decemberip 2.-ata tungaanut tusarniaassutigineqarput, taakkualu pillugit Naalakkersuisut kujataani innuttaasunut sapaatiuppamiit tusarniaallutik ataatsimiisitsisaqattaassapput.

Inuussutissarsiornermut, Aatsitassaqarnermut Suliffeqarnermullu Naalakkersuisoq Jens-Erik Kirkegaard, Pinngortitamut Avatangiisinullu Naalakkersuisoq Kim Kielsen Kommune Kujalleq peqatigalugu tusarniaallutik ataatsimiisitsinissanut aggersaapput.

Inuussutissarsiornermut Aatsitassanullu Naalakkersuisoq Jens-Erik Kirkegaard:
- Aatsitassanik pisuussutivut inuiaqatigiit siunissami ineriartortinneqarnerannut tunngaviit ilangilluinnalertussaavaat, taamaammat innuttaasut soqutigisaqaqatigiillu amerlanerpaat aatsitassanut suliniutinut sunniuteqarlutik peqataatinneqartarnissaat Naalakkersuisuniit pingaartipparput. Tanbreezip suliniutaanut tunngatillugu kujataani ataatsimiisitsinerni sunniuteqarnissamut periarfissaq amerlanerpaanit atorluarneqarumaaraat neriuutigivara.  

Ataatsimiisitsinerit ukunani ingerlanneqassapput:

Qaqortup Katersortarfiani sapaat 17. november ualikkut nal. 14.00
Alluitsup Paani Klubbimi ataasinngorneq 18. november ullaakkut nal.10.00
Nanortallip Katersortarfiani ataasinngorneq 18. november unnukkut nal.19.30
Narsap Katersortarfiani marlunngorneq 19. november unnukkut nal. 19.30