Appa pillugu plakati nutaaq

– ”Appap mannia KUULTITUT naleqarpoq”

Taamatut oqariartaaseqarlutik Naalakkersuisunit erseqqissaatigineqarpoq, innuttaasut tamarmik akisussaaffeqaqataammata Nunatsinni appanik piujuartitsilluni iluaqutiginninnerup qulakkeerneqarnissaanut, taamaasilluni kinguaariit tulliit aamma siunissami timmissamik kusanartumik mamarluartumillu taassuminnga nuannaaruteqartarsinnaanissamut.

”Appap mannia kuultitut naleqarpoq” appat pillugit plakatimi oqariartaasiuvoq nutaaq, Aalisarnermut, Piniarnermut Nunalerinermullu Naalakkersuisoqarfiup (APNN), timmissanik "Timmissat Sammillugit" pillugit paasititsiniaanerup ilaatut saqqummersitaani, taanna aasaq aallarnerneqarpoq tassani Ilulissani aamma Upernavimmi innuttaasunik ataatsimiisitsisarnerni.

Plakatit ilaatigut innuttaasunut eqqaasitsisuuvoq appaativut qanoq mianernartiginerinut, kiisalu isumassarsiorfiusussaalluni nunatsinni atuarfinni meeqqerivinnilu meeqqat atuarfiini ilinniartitsisunut perorsaasunullu appat pillugit sammisaqartarnerni.

Appa pillugu plakati atuarfinnut, atuakkanik atorniartarfinnut sinerissamilu kommunip allaffiinut nassiussuunneqassaaq.

Plakatimi assiliartarineqartut eqqumiitsuliortumit Augusta Marie Jeremiassen-imit suliarineqarsimapput.

Plakati 1

Plakati 2