Qaleralittassanik qaffaaneq

Fiskefartoej

Qeqertarsuup Tunuani Uummannamilu umiatsiaaqqanut 6 meterit inorlugit angissusilinnut sinerissamut qanittumi qaleralittassanik qaffaaneq.

Umiatsiaaqqanut 6 meterit inorlugit angissusilinnut sinerissamut qanittumi qaleralittassat aqutsiveqarfimmi Qeqertarsuup Tunuani 200 tonsinik aqutsiveqarfimmilu Uummannami 100 tonsinik qaffanneqarnissaat Naalakkersuisut novembarip ulluisa 22-anni aalajangerpaat. Pisassiineruneq 25. november 2013-imit atuutilissaaq.

Taamatut pisassiissutinik qaffaasoqarnerani ilimagineqarpoq, aalisarneq 2013-ip sinneranut ingerlatiinnarneqarsinnaassasoq. Qeqertarsuup Tunuani 1. decembarimi pisassiissutit 100 tonsiusut tamanut pisassiissutigineqassapput, novembarilli qaammataani sinniisoqarsimanera pissutigalugu 32 tonsinik ilanngaasoqassalluni. 200 tonsinik pisassiinerunikkut umiatsiaaqqat 6 meterit inorlugit angissusillit taamaalillutik 2013-ip sinneranut 268 tonsinik pisassaqalissapput.

Aqutsiveqarfimmi Uummannami pisassiissutit annertussusaat 51 tonsiusut 1. decembarimi tamanit aalisarneqarsinnaalissapput. Tamatumunnga ilanngunneqassapput qaammammut novembarimut sinneruttut 24 tonsit ilanngunneqarnissaat, aalisarnermi siusippallaartumik unitsinneqarsimammat. Tassa imaappoq, pisassiissutit 100 tonsit ilanngullugit ukiup sinneranut umiatsiaaqqanut pisassat 175 tonsit tamanut pisassiissutigineqassapput.

Sumiiffik aqutsiveqarfiusoq Upernavik eqqarsaatigalugu ukiup sinneranut umiatsiaaqqanut pisassassiissutit 131 tonsiussapput. Tamanna tunngavigalugu ilimagineqanngilaq, sumiiffimmi pisassanik qaffaasoqarnissaa pisariaqartinneqassasoq.