Savalimmiunut tikeraarneq isumassarsiffiulluartoq

Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisoq Nick Nielsen, Nunat Avannarliit Oslomi Ataatsimeersuarneranni peqataanerminut uiggiullugu, sapaatip akunnerani kingullermi sisamanngornermiit arfininngornermut Savalimmiunut tikeraarpoq.

Ministereqataa Bjørn Kalsø, Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoq tikeraartitsisuuvoq.


Bjørn Kalsø aamma Nick Nielsen

”Tikeraarneq assorsuaq pissarsiaqarfiuvoq, aamma nunani avannarlerni sanilerisatta ukiuni aggersuni suleqatigineqarnerulernissaat qularutiginngilara” Nick Nielsen oqarpoq nangillunilu:

”Savalimmiut 48.000-it missaannik inoqartut Nunatta inuinit tusintilinnik qulingajannik inukinnerupput. Savalimmiormiut oqaasiisa suliffinni nalinginnaasumik atugaalersimanerat iluatsissimasoq takullugu qiimmaallannarpoq. Anguniagaq taanna uaguttaaq kalaallit inuiaat ilu-ngersuullugu anguniagaraarput. Tassunga killissagutta ilinniagaqarnissaq, aammali anguniarnerani akuusussat tamarmik piumassuseqarluarlutillu kajumissuseqarnissaat aqqutissaapput. Suliassaq taanna uagutsinnut Kalaallit Nunaanniittunut naleqqiullugu savalimmiormiunut oqinnerusimassaaq, inuimmi qeqertanut nuuttartut oqaatsitigut ilaqutariissutsikkullu attuumassuteqanngitsut ikittuararsuupput. Aamma nunanit avannarlernit allaniit, savalimmiormiut oqaasiinut qanittunik oqaaseqarfiusuniit qeqertanut nuuttartut qaammatit pingasut missi-nginnaat qaangiukkaangata savalimmiormiusut ilikkartarnerat misilittakkat takutippaat. Uagut oqaatsivut nunani avannarlerni oqaasiusunit allaanerujussuupput, oqaatsilli kulturikkut paaseqatigiinnissamut inuiaqatigiinnullu akuliunnissamut pingaaruteqarluinnartunut ilaammata isumaqarpunga, maanga nuuttartunut innuttaasunullu suli kalaallisut oqaaseqartuunngitsunut tunngatillugu ataatsimoorussamik suliniuteqarnissarput pisariaqartoq. Aamma tamanna maanga nuuttartut amerlanerujussuit ullumikkornit sivisunerusumik maaniikkumalernerannik kinguneqassasoq qularinngilara.”

”Oqaatsit pillugit inatsit 2010-mi aalajangiunneqarmalli inatsimmut allannguutissatut siunnersuutissamik, nunami pisortatigoortumik oqaatsit innuttaasunik sullissiffiusuni tamani atugaalernissaannik qulakkeerisussamik suliaqarnissaq Naalakkersuisunit iluatsinngitsumik su-lissutigineqarsimagaluarpoq. Naalakkersuisut pilerisaarineq pillugu inatsisissatut siunnersuummik 2014-imi upernaakkut ataatsimiinnissami saqqummiussissapput, tassani siunnersuutiginiarlutigu pisortatigoortumik oqaatsitta piseqqusaarutini, annonceni allagartalersuinernilu pinngitsooratik atugaalernissaat, soorlu Savalimmiuni taamaattoqartoq. Taassuma saniatigut aamma isumaqatigiissutit inatsisitigut pituttuisuusut, soorlu illusinermi, kalaallisut allassimasalernissaat qulakkeerniarlugu sulinerput ingerlaqqissaaq. Pissutsit tamakkununnga tunngasut savalimmiormiut oqaasinut tunngatillugu aaqqinneqareersimapput, taamaammat tamakku maani aamma anguneqarsinnaanissaat piviusorsiortuusoraara.”

Nick Nielsen tikeraarnermini Torshavnimi Klaksvikimilu meeqqat atuarfiannut kiisalu imarsiornermik ilinniarfinnut pulaarpoq. Skúlin á Argjahamri-mut Torshavnimiittumut pulaarnini pillugu Naalakkersuisoq ima oqarpoq:

”Meeqqanut atuarfitsinni kikkunnik tamanik sullissisinnaasariaqarnitta pingaartuunera naalakkersuisunngoramali oqaatigiuarpara – isuma taanna pulaarninni aalajangiusimanerulerpara, paasinarsivormi akuutitsineq Savalimmiuni meeqqat atuarfianni tunngaviulluinnartut ilagigaat. Atuarfik pulaagarput nutaarluinnaavoq, uagullu maanna tamakkuninnga nutaanik sanaartoriaaserput assigalugu sanaajulluni, tassa init atuarfiusut angisuujullutik, qaamasuullutik ammaannartuullutillu. Meeqqat atuarfiat maani nalunngisatsituulli ikaarsaariarfinnut agguataagaavoq, atuartitsinerillu ilaat inini angisoorujussuarni arlalinnik ilinniartitsisoqarluni, matumani aamma immikkut ilinniartitsisoqarluni ingerlanneqartarlutik. Atuarfiup pisortaata ilinniartitsisullu oqaatigaat init atuartitsiviusut assigiinngiiaartuunerat pitsaaqutaasoq. Aammattaaq atuartut ilikkagassaminnik ilikkarniarnerminni ikiorneqartariaqartut tapersersorneqartariaqartullu kisiisa samminagit, aammali atuartut pikkorinnerusut unammilligassaqartinneqarnissaat pingaartuusoq tikkuarneqarpoq. Kiisalu atuartut iluatsittumik ingerlassappata angajoqqaanik suleqateqarnerup aammalu ilinniartitsisoqatigiit atuartuutiminnut tunngatillugu ataatsimoorussanik naleqartitaqarnissaasa najoqqutassaqartitsinissaasalu aalajangiisooqataalluinnartuunerat immikkut erseqqissaatigineqarpoq.”


Skúlin á Argjahamri-mi uullaakkut katersuunneq

Nick Nielsenilu Imarsiornermik ilinniarfiit pillugit ima oqarpoq:

”Paamiuni, Nuummi Uummannamilu Imarsiornermik Ilinniarfinnik pilersitsinerit naalakkersuisunngorninni Naalakkersuisunut inatsissutigisama siullersaraat. Taamaattumik uagut imarsiornermik ilinniarfiutitta qanoq ingerlanerat soorunami malinnaaffigeqqissaarpara, tamatumanilu Savalimmiut, inuiattut imarsiornermik ingerlataqartuusutut ilisimaneqarluartut aammalu Torshavnimi Maskinmesterinngornianut Umiarsuarnillu ingerlatsisunngornianut ilinniarfimmi Vinnuháskúlinimi 300 sinnerlugit ilinniartoqartut maligassaalluarput. Savalimmiuni imarsiornermik ilinniarfiit isumassarsiffiulluartumik pulaareerlugit, Savalimmiuni ilinniarfiit uagullu Imarsiornermik ilinniarfiutitta attaveqaqatigiilernissaat isumagissavara. Taakku assigiinngitsorpassuarnik suleqatigiissutissaqarumaarnissaat qularutiginngilara – soorlu isumannaallisaanermik pikkorissaanerit pillugit, pikkorissaanerimmi inatsisitigut piumasaqaataasut ingerlannissaannut atortorissaarutit nutaaliaasut Sjónám-imi, tassa Klaksvikimi Skipperskolemi pigineqarput.”