Naalakkersuisunut ilaasortanik nutaanik toqqaaneq

Partii Inuit Naalakkersuisooqatigiinnermi peqataajunnaarneranni Naalakkersuisunut ilaasortaasimasoq Miiti Lynge (PI) taartissarsiorneqartussaavoq. Siusinnerusukkut Ineqarnermut, Pinngortitamut Avatangiisinullu Naalakkersuisoqarfik ullumi ulloq 5. november 2013 atuutilersumik marlunngorlugu avinneqarpoq;

  • Ineqarnermut Naalakkersuisoqarfik aamma,
  • Pinngortitamut Avatangiisinullu Naalakkersuisoqarfik.

Ineqarnermut Naalakkersuisunngorpoq Siverth K Heilmann, 60, Maniitsuminngaaneersoq, aammalu maannakkut Atassut sinnerlugu Inatsisartuni ilaasortaasoq. Siverth K Heilmann 2001-imili Inatsisartuni ilaasortaavoq, aammalu piffissami 2005-2009-imi Inuussutissarsiornermut, Suliffeqarnermut Inuussutissarsiutinullu Ilinniartitaanermut Naalakkersuisuusimalluni.

Ineqarnermut Naalakkersuisoqarfimmi Naalakkersuisoqarfimmut pisortatut atorfimmut inissikkallarneqarpoq Olafur Nielsen.

Pinngortitamut Avatangiisinullu Naalakkersuisunngorpoq Kim Kielsen, 47, Siumut. Kim Kielsen 2005-imili Inatsisartuni ilaasortaavoq, aammalu piffissami 2007-2009-imi Ineqarnermut, Attaveqarnermut Aatsitassanullu Naalakkersuisuusimalluni.

Pinngortitamut Avatangiisinullu Naalakkersuisoqarfimmi Naalakkersuisoqarfimmut pisortaq tassaavoq maannakkut Ineqarnermut, Pinngortitamut Avatangiisinullu Naalakkersuisoqarfimmi Naalakkersuisoqarfimmut pisortaasoq Søren Stach Nielsen.


Inussiarnersumik inuulluaqqusillunga

Aleqa Hammond, S
Naalakkersuisunut Siulittaasoq

 

Kim Kielsen Siverth K. Heilmann