Nunap assiliornermi ikiuunnissamut neqerooruteqarpoq

Siverth Heilmann sydkorea

Korea kujalleq Kalaallit Nunaanni nunap assiliornermi ikiuunnissamut neqerooruteqarpoq

- Koreap kujalliup Kalaallit Nunaanni nunap assiliornermi suleqataanissamut neqerooruteqarnera isumalluarnartorujussuuvoq. Kalaallit Nunaanni nunap assiutigut pisoqalisimapput eqqoqqissaaratillu. Nunap assingi naammanngitsut ullumikkut suliffissuaqarnikkut ineriartortitsinermut akimmisaartitsisuusarput, aammalu kangerlunni imaatigut angalasarnermut pinngortitamilu angalaarnermi nalornisoortitsisarlutik. Nunami sumiiffinnut paasissutissaqarnermi teknologiikkut iluaqutissat nutaat uagutsinnut kalaallinut pingaaruteqarluarput, aammalu inuiaqatigiinni ineriartortitsinissamut tapertaalluassallutik, Ineqarnermut Naalakkersuisoq Siverth K. Heilmann oqarpoq.

Ineqarnermut Naalakkersuisoq Siverth K. Heilmann novembarip ulluisa 12-anniit 15-annut Seoulimi, Koreap kujataaniittumi nunat tamalaat paasissutissarpassuanik ilaqartunik nunat assiliortarneq – geospatial - pillugu ataatsimeersuarnerannut peqataaqqammerpoq, Kalaallit Nunaat sinnerlugu Smart Geospatial 2nd High Level Forum 2013-imut peqataanissamut Korea kujallermi naalakkersuisunit qaaqquneqarluni, kalaallillu aallartitaannut aamma ASIAQ peqataavoq.

Ataatsimeersuarnermi Ineqarnermut Naalakkersuisup Siverth K. Heilmann-ip Koreap kujataani Nunamut, Attaveqarnermut Assartuussinermullu Ministereqarfimmi ministeri Hr. Seo Seunghvan, geospatialimik suliassaqarfimmi nunap assiliornermut ineriartortitsinermullu akisussaasoq illugiilluni niueqatigiinnissamik isumaqatigiissuteqarnissaq pillugu ataatsimeeqatigaa. Ataatsimiinnermi ministerip Koreameersup Kalaallit Nunaanni nunap assiliornermi, kiisalu piginnaasanik ineriartortitsinermi avitseqatigiinnermilu ikiuunnissartik neqeroorutigaa.

Nunap assinginik iluarsaatanik nutaanik suliaqarnissaq annertoorsuuvoq. Danmark nalinginnaasumik nunap assiliornermi oqartussaasuuvoq, taamaattumillu suliassaq Danmark suleqatigalugu ataqatigiissaarneqassaaq. Taamaattumik nunat pingasuillutik akunnerminni ataatsimeeqatigiinnissaat, Koreallu kujalliup peqataaffigisaanik suleqatigiinnissamik aalajangersimasumik isumaqatigiissuteqarnissaat kalaallit tungaanniit sulissutigineqassaaq.

Koreap kujalliup aamma kalaallit atorfilittaasa akornanni ataatsimeeqatigiinnermi paasinarsivoq, Korea kujalleq nunap assiliornissamut teknologiikkut pisinnaasaqarluartoq. Allaammi qaammataasanik assilisanik ersarilluartunik assiliinissaq, taakkuninngalu nunap assiliornermut atuinissaq periarfissaqarpoq – taakkununnga 3D atorlugu nunap assinginik suliaqarsinnaaneq ilaalluni. Smartphone-nut app’s-inik naleqqussaasoqarsinnaavoq, taamaalillunilu Kalaallit Nunaanni pissutsinut naleqquttunngortitsisoqarsinnaalluni, taamaalillunilu nunap assiliornermi innuttaasut akuutinneqarsinnaanerat aamma taaneqarpoq.

Korea kujalleq ukioq manna siusinnerusukkut Nunani Issittuni Isumasioqatigiinnut nakkutilliisutut peqataavoq, taamaattumillu Koreap kujalliup nunarsuup immikkoortuani ineriartortitsinermi annertunerusumik suliaqarnissani ikiuunnissanilu kissaatigaa. Koreap kujalliup ineriartortitsipiloornermini suliffissuaqarnikkut ineriartortitsinerminut tapertatut nunap assinginik sukumiisunik atuisimavoq, taakkununnga teknologii qaffasissoq 3D atorlugu nunap assiliorneq ilaalluni.

Kalaallit Nunaat nunat 22-t allat peqatigalugit ataatsimeersuarnermut peqataavoq, ataatsimeersuarnerullu ingerlanerani kalaallit aallartitaasa aamma Chilep Nepalillu aallartitai, kiisalu Koreap kujataani ingerlatseqatigiiffiit ilisimatusarfiillu geospatialimik suliaqartut assigiinngitsut ataatsimeeqatigaat.