BSU-mit taarsigassarsilluni illulianut iluarsaassinissamut tapiissutit

Ineqarnermut Naalakkersuisoq Siverth K. Heilmann ilisimatitsivoq;

"- 2014-imut Aningaasanut Inatsisip akuerineqarnerani BSU-mit taarsigassarsilluni illuliaasimasunik iluarsaassinissamut aningaasaliissutissanik immikkut ittumik immikkoortitsisoqarpoq.

Tassani BSU-mit taarsigassarsilluni illuliaasimasunik iluarsaassinissamut aningaasaliissutissanik salliutitsinissaq pingaaruteqartutut isumaqarfigaara. Aaqqissuussineq BSU-mit taarsigassarsilluni illulianik piginnittunut, killilinnik isertitaqartartunut, tamatumalu kingunerisaanik taarsigassarsiat erniannut akilersugassanillu akilersuisinnaanngitsunut atugassatut eqqarsaatigineqarpoq.

Namminersorlutik Oqartussat BSU-mit taarsigassarsilluni illulianik iluarsaassinissamut, alliliinissamut pitsanngorsaanissamulluunniit annerpaamik 100.000 koruuninik tapiissuteqarsinnaapput.

Akuerineqassagaanni inoqutigiinni isertitat akileraarutissaasut ukiumut 180.000 koruunit sinnersimassangilaat. Utoqqaat amerlasuut BSU-mit taarsigassarsillutik illuliarisimasaminnut aningaasaqarnikkut taperserneqarnissamik ikiorserneqarnissamillu pisariaqartitsisut ilisimavara.

Taamaattumik BSU-mit taarsigassarsillutik illuutillit soqutiginnittut kajumissaarumavakka A/S Inissiaatileqatigiiffik INI-mut, Namminersorlutik Oqartussat sinnerlugit aaqqissuussinermik aqutsisuusumut saaffiginneqqullugit."