Tanbreezip suliniutaa Qaqortormiunit tigulluarneqarpoq

 

Qaqortumi Katersortarfik Tanbreezip suliniutaa pillugu tusarniaaffiuvoq, ataatsimiinnermilu Inuussutissarsiornermut Aatsitassanullu Naalakkersuisoq Jens-Erik Kirkegaard, Avatangiisinut Pinngortitamullu Naalakkersuisoq Kim Kielsen Borgmester Jørgen Wæver Johansenilu siuttuupput.

 

Aatsitassanik piiavissami sulisussanik ilinniartitsinissaq, piiavimmilu ajutoortoqassangaluarpat upalungaarsimasussat, nukissuutinik atuinissaq avatangiisinullu sunniutissat pillugit Qaqortormiut apeqquteqarput, 

 

Tusarniaalluni ataatsimiinnermi Tanbreezip avatangiisinut sunniutissanik nalilersuilluni nalunaarusiaa aamma inuiaqatigiinni iluaqutaasumik sunniutissanik nalilersuilluni nalunaarusiaa saqqummiunneqarput.

 

Pinngortitaleriffimmit aamma DCEmit ilisimatuussutsikkut siunnersortit arlaannaannulluunniit attuumassuteqanngitsut avatangiisinut sunniutissanik nalilersuinermik maanna tusarniaassutigineqartumik naliliillutik saqqummiussipput.

 

Inuussutissarsiornermut Aatsitassanullu Naalakkersuisoq Jens-Erik Kirkegaard tusarniaalluni ataatsimiisitsinermik iluarisimaarinnippoq

-       Unammillernartut pingaarnerit tassaapput Kalaallit Nunaata iluaqutissaanik suliffissannik piiaavissamullu sullissisoqarsinnaanissaanik qulakkeerinninnissaq. IBAmik isumaqatigiinniarnissat qilanaaraakka, tassuunami amerlanerpaat suliffissaqalernissaat piiaavissamullu sullissisinnaasussat anguniarneqassapput, Naalakkersuisoq Jens-Erik Kirkegaard oqarpoq.

 

Avatangiisinut Pinngortitamullu Naalakkersuisoq Kim Kielsen aamma ataatsimiisitsinermik iluarisimaarinnippoq.

-       Piiavissamik pilersitsiniarnermi avatangiisinut ajortumik sunniuteqannginnissaanik kissaateqarnerput ataatsimiigiartorpassuit isumaqatigineqartoq paasillugu pitsaasuuvoq, tassa avatangiisinik innarliinani piiavissaq piviusunngortinneqarsinnaasoq ilisimatuussutsikkut siunnersortinit nalilerneqarpoq, Avatangiisinut Pinngortitamullu Naalakkersuisoq Kim Kielsen oqarpoq.