Aningaasanut inatsisissatut siunnersuut kræftimut tunngasuni annertuumik pingaarutilik

 

Aqagu ulloq kræftimut tunngasuni annertuumik pingaaruteqartussaavoq. Ulloq 6. november ”2014-imi Aningaasanut inatsisissatut siunnersuut” Inatsisartut oqaluuserisussaavaat, aappassaaneerneqarnissaalu sioqqullugu ”Kræfti pillugu pilersaarummut siunnersuut 2013”-ip atuutsinneqalernissaani piffissap aallartinneranut aningaasaliissutissanik nassaartoqarsimavoq.

Aningaasanut inatsisissatut siunnersuummi ukiuni tulliuttuni sisamani, tassa piffissami aningaasanut inatsisip atuuffiani, kræfti pillugu pilersaarummut atugassanik 18,7 mio. koruuninik illikartitsisoqarpoq. Tassa imaappoq, aningaasanut inatsisissatut siunnersuut akuerineqassappat, kræfti pillugu pilersaarutip atuuffissaata aallartinneqarnissaa ani­ngaasaliiffigineqassaaq.

-”Kræfti inuiaat nappaatigaat, amerlanerpaartatsinnullu qanimut misigineqartarpoq. Taamaattumik pingaaruteqarpoq nunatsinni kræftip nakorsarneqartarnerata nunani tamalaani pitsaassutsimut nallersuussinnaanissaa. Kræfti pillugu pilersaarutikkut tamanna Naalakkersuisut qulakkeerniarpaat”, taama oqarpoq Peqqissutsimut Attaveqarnermullu Naalakkersuisoq, Steen Lynge, nangillunilu:

-”Naammagisimaarluinnarpara Aningaasanut inatsisissap aappassaaneerlugu oqaluuserineqarnissaanut, siunnersuummik kræfti pillugu pilersaarutip aningaasaliiffigineqarnissaa ilanngullugu, saqqummiussisinnaagatta. Pingaaruteqarluinnarpoq Aningaasanut inatsisip akuersissutigineqarnerata kinguninngua kræfti pillugu pilersaarummi taakkartorneqartut piviusunngortitilersinnaagutsigik”.

 

”Kræfti pillugu pilersaarummut siunnersuut 2013” ukiuni 13-ini atuutissaaq. Taamaalilluni pilersaarutaavoq sivisuumik atuuttussaq, tamatumanilu suut tamarluinnarmik pineqarput, nappaatip paasiniarneqarneraniit nakorsarneqarneranut, peqqissereernerup kingorna piginnaanngorsaaqqinneq imaluunniit kræftimik nappaat ajorunnaarsinneqarsinnaatinnagu anniaatit ippinnarunnaarsalugit katsorsaaneq.

Kræfti pillugu pilersaarutip atuunnerani ukiuni siullerni sisamani ilaatigut pingaartinneqartussaapput:

  • Kræftip sapinngisamik piaartumik paasineqartarnissaa
  • Napparsimasut paasitinneqarluartarnissaat napparsimanerullu ingerlarnata pitsaasuunissaa
  • Napparsimasup taassumalu ilaqutaasa suleqatiginerisa patajaallisarneqarnissaa
  • Arnat kingornuttakkamik iviangitigut kræfteqalersinnaasut mammografeerlugit misissorneqarsinnaalernissaat
  • Nakorsaatitortitsilluni kræftimik nakorsartittarnerit arlaqarnerusut nunatsinnut nuun­neqarnissaat
  • Anniaatit ippinnarunnaarsarlugit katsorsaanermut Namminersorlutik Oqartussat kommunillu peqatigiillutik pilersaarutissaannik suliaqarneq

 

 

Paasissutissat sukumiinerusut pissarsiariniaraanni Peqqissutsimut Attaveqarnermullu Naalakkersuisoq Steen Lynge, allattaa Aviâja Mørch Amondsen aqqutigalugu oqarasuaatikkut +299 55 33 03 imaluunniit e-mailikkut avma@nanoq.gl attaveqarfigineqarsinnaavoq.