Narsami atuarfik unittuunngilaq

Kommune Kujallermi kommunalbestyrelsimi ilaasortamut Benjamin Kielsenimut akissut.

Arfininngormat (16. november 2013-imi) Sermitsiap nittartagaani allaaserisaq qulequtalik ”Atuarfiliorneq unittoorpoq” atuarneqarsinnaavoq. Allaaserisaq Narsami atuarfiliornermut tunngasuuvoq, aasarlu Kommune Kujalliup atuarfik atorunnaarpaa, aammalu atuartut ilinniartitsisullu atuarfiup iluarsaanneqarnissaata tungaanut pissusiugallartussat pillugit akerliussutsimik takutitsillutit aqqusinerni angalaarput.

Inuiaqatigiit taamatut nunatsinni sumiiffinni assigiinngitsuni meerartatta peqqissusaanik ulorianartorsiortitsineq pissutigalugu atuarfinnik atuiunnaartariaqalertarnerat tamatsinnut annernartartoq isumaqarpunga. Tamanna naammaginanngilaq, uangalu kommunit aserfallatsaaliuinissamullu akisussaasuusut allat kaammattuinnarsinnaavakka, illut ilinniartitsiviusut assigisaallu isumannaatsumik pitsaassuseqarnissaat peqqissutsimullu ulorianartorsiortitsinnginnissaat, aammattaaq ukiunut tulliuttunut tamatuma naatsorsuutigineqarsinnaanissaa ingerlaavartumik qulakkeerniartaqqullugu. Inortuinissap tungaanut utaqqinissaq akisuujuvoq naammaginaranilu.

Sanasut il.il. aallartinnginnerini, naggataagullu suliassat atorneqarnissaminnut naammassineqannginnerini pisariaqartarpoq sanaartornissaq minnerunngitsumillu iluarsaassinissap pilersaarusiorneqarnissaa. Tamanna biilimik nutaamik pisinermut, pisisup tuniniaasumi tunisassiamik nalinginnaasumik toqqaanissamut periarfissaqarfigisaanut assersuunneqarsinnaanngilaq. Sanaartorneq asseqanngitsuuvoq nallerneqarsinnaananilu, sanaartukkallu immikkoortui tamarmik suliamut ataatsimut tassungarpiaq immikkut ilusiligaasarput.

Suliassaq taamaattoq piffissamik atuiffiusussaavoq, sanaartornerpiamullu tunngaviusoq pitsaasuusussaavoq, taamaattumillu Narsami atuarfimmi pilertortumik suliaqartoqassappat tamanna naleqquppallaanngilaq. Suliassat suliarineqannginnerini siusissukkut pilersaarusiornissaasa, kiisalu minnerunngitsumik maannatut tupaallaataasartumik naapertuutinngitsumillu suliassat siuarsarneqartarnerat atornagit sulisarnissatta pisariaqartinneqarnera annertusiartortoq Ineqarnermut Naalakkersuisutut takusinnaavara. Neriuppunga kommuni allallu tamatumunnga suleqataajumaartut oqaloqataajumaartullu.

Suliami aalajangersimasumi matumani kommunalbestyrelsimut ilaasortaq Benjamin Kielsen oqarsimanerarneqarpoq, atuarfiliornerup uninnganeranut Kommune Kujalleq pisuunngitsoq.

Pissusiviusut malillugit aasaq kommunip suliassamut missingersuusiai siunnersuutaalu tunngavigalugit atuarfimmut aningaasalissutit ilaneqarnissaat Inatsisartut aningaasaqarnermut ataatsimiititaliaanut qinnutigineqarpoq. Taamatullu pissusiviusut malillugit kommunip nammineerluni sanaartornermik isumaginninnissaa aningaasaliissutinullu akisussaasuunissaa tunngavigalugu aningaasaliissutit ilaneqarnissaat qinnutigineqarpoq, tamanna kommunimit kissaatigineqarpoq, tamatumalu kingorna aatsaat kommunip suliassaq isumaginiarnagu kissaateqarpoq.
Tamatuma kingunerisaanik Namminersorlutik Oqartussani INI Byggeteknik-ip suliassaq aatsaat septembarip qaammataani aallartissinnaalerpaa. Tunniussinerup kingorna illussanik titartaasartumut nutaamut suliakkiinissaq pisariaqarsimavoq, taamatullu suliassamut siunnersuutip misissorneqarnissaa pisariaqarsimalluni.

Suliassat tamarmik sapinngisamik sukkanerpaamik ingerlanneqarput, aammalu sanaartornissap suliarineqarnera unittuunngilaq. Peqqissaartumilli sulisariaqarsimavugut. Atuarfiliorneq aningaasaliissuteqarnikkut Qaqortup atuarfiata, Kommune Kujalliup isumagineqartup iluarsaanneqarneratut ajortoorfiutigissappat tujorminartorujussuussaaq. Taanna sanaartukkat, ukiut kingulliit ingerlanerini immikkut aningaasaliissuteqarnissamut pisariaqartitsiviusut annerit ilagaat.

Kommunit, Namminersorlutik Oqartussat soqutigisaqartullu kattuffiisa akornanni Kalaallit Nunaanni sanaartukkat ingerlanneqartarnerinik qanoq iliorluta pitsanngorsaasinnaanerluta oqallittoqarnissaanut kaammattuerusuppunga.



Inussiarnersumik inuulluaqqusillunga




Siverth K. Heilmann