Tanbreezip suliniutaa tapersersorneqarpoq

Tanbreezip suliniutaa Nanortalimmiunit aamma Alluitsup Paarmiunit tapersersorneqarpoq

Nanortalimmi Katersortarfiup ulikkaaqqasup aamma Alluitsup Paani tusarniaalluni ataatsimiisitsinermi peqataasut amerlasuut takutippaat innuttaasut Tanbreezip Killavaat Alannguanni suliniutaannut aalajangiiniarluni sulinermi sunniuteqaqataarusuttut.

 

“Taama amerlatigisut peqataammata aamma Naalakkersuisut tusarniaallutik ataatsimiisitsinerannut tapersersuisoqarluarmat nuannaaqaanga. Anguaniakkatta pingaarnerit ilangaat innuttaasut aatsitassanut suliniutini sunniuteqarlutik peqataatinneqartarnissaat”, Inuussutissarsiornermut Aatsitassanullu Naalakkersuisoq Jens-Erik Kirkegaard aamma Avatangiisinut Pinngortitamullu Naalakkersusoq Kim Kielsen oqarput.

 

Kujataani suliffissat nutaat pilersinneqarnissaat aamma inuussutissarsiutit ineriartortinneqarnisaat pisariaqartinneqatut, tusarniaalluni ataatsimiisitsinerni Naalakkersuisunut, Tanbreezimut aamma Kommune Kujallermi borgmesterimut apeqqutigineqartartunit erserpoq.

 

“Uumasunik aamma aatsitassanik pisuussutit Kalaallit Nunaanni innuttaasunit pigineqarput inuiaqatigiinniillu atorneqarlutik iluaqutaasussaapput. Taamaattumik suliffissat amerlanerpaat aamma aatsitassarsiorfimmut sullissisinnaanissamut periarfissat pitsaanerpaat IBAmik isumaqatigiinniarnerni, Namminersorlutik Oqartussat, Kommunep aamma ingerlatseqatigiiffiup Tanbreezip akornanni ingerlanneqalerpata anguniarneqassapput”, Jens-Erik Kirkegaard aamma Kim Kielsen isumaqatigiillutik oqarput.

 

“Nuannaarutigaara suliffeqarfimmut attuumassuteqanngitsunit siunnersortinit oqariartuutigineqarmat, piiaavissatut suliniut sumiiffimmi uumasunik piniakkanut sunniuteqarnerlunnavianngimmat”, Avatangiisinut Pinngortitamullu Naalakkersuisoq Kim Kielsen oqarpoq.